«Российскяй Федерациянь финно-угорскяй народонь Ассоциация» Общероссийскяй движениять председателец П.Н.Тултаев: «Катк сон кармай цебярь эряфонь канни пингокс!»
—Кельгома ялгат! «Российскяй Федерациянь финно-угорскяй народонь Ассоциация» Общероссийскяй общественнай движениять лемста поздравляндатядязь тинь малаткшни Од кизоть и Роштувать мархта!
Нят семейнай илат, сяс синь марса васьфтемасна и ётафтомасна, пингстост лямбе корхнематне кандыхть кенярдемань и павазонь валда мяльхть-арьсемат.
Од кизонь и Роштувань илатнень пингста пяк важна, штоба тядятне-алятне, мирттне-рьвятне, иттне и мала ломаненте улельхть марса и арьсельхть фкя-фкянди аньцек цебярь.
тушенды кизось пяшкотьф стама вызовса, конат нинге сяда пяк маласькофтомазь минь фкя-фкянди. Марса строясаськ сай пингть Родинаньконь и иденьконь лемс, сявомок эстейнек нежекс странань нароттнень лама веконь койснон.
Арьсян теенть и мала ломанентенди кеме шумбраши, кудонь лямбе, паваз, цебярь эряф и лангозонза валда ванф! Катк Од кизось кармай пара и цебярь эряфонь канни пингокс!
Мордовскяй (мокшень и эрзянь) народть Межрегиональнай общественнай организациянц председателец, профессорсь Ю.А.Мишанин: «Газетати сатфкст, а лувихненди—шумбраши!»
—Кельгома ялгат! Кельгома «Мокшень правдась» и сонь лувиенза! Аделсеви тага фкя киза газетать оцю историясонза, минь эряфсонк. Тя кизоста ульсь лама цебярь, кеняртьфти куля, ульсть и стака шит, стака кит.
Инь кеняртьфтись ся, што минь странаньке—Россиясь—сувси эсь кизонза, эсь эряфозонза, эсь коензонды-иланзонды, аф ваны сянь лангс, мезти «тонафтыхть» сонь «ялганза». Тя кись стака, но лия аш. Кода мярьгсь Президентоньке Владимир Владимирович Путин: «Россиясь эряй эста, мзярда кармай эсь лацонза, моли эсь киганза».
«Мокшень правдась» лама сёрмады иланьконь-коеньконь, культураньконь, историяньконь, странаньконь аралаензон—СВО-нь участникнень колга.
Арьсян сай Од кизоста газетаньконди сяда лама луви, од тефт и сатфкст, а лувихненди—шумбраши, лямбе и валда эряф!
Н.П.Огарёвонь лемса Мордовскяй государственнай университетть ректороц Д.Е.ГЛУШКО:«Пара мяльхть-арьсемат, кельгома и кудонь лямбе!»
—Кельгома ялгат! Н.П.Огарёвонь лемса Мордовскяй государственнай университетонь сембе коллективть лемста поздравляндатядязь тинь малаткшни Од кизоть мархта! Тя илась фалу ульсь и лядонды пяк эрявикс и питни пингокс странаньконь эрь эряенцты. Минь васетькшнетяма радня и мала ломаненьконь мархта, азонкшнетяма фкя-фкянди пара мяльхть, тиенттяма тушенды кизоти итокт.
Катк Од кизось эрь кудти канды паваз, кельгома и кудонь лямбе, а тяфта жа мяльхть-арьсемат сянь колга, што минь араласаськ видешить, Россияньконь суверенитетонц и сонь валда сай пингонц. Мяляфтость: минь виеньке—марстоньшиса и пара тевонь тиемаса! Малаткшни Од кизоть мархта, кельгома ялгат!