Саранскяйса етафтовсь митинг-концерт
Ётай недялять, 23 сентябрьста, Саранскяйса ётафтовсь «Минценнетнень аф кадондсаськ» митинг-концерт. Сон лемтьфоль Донецкяй, Луганскяй Народнай Республикатнень, Херсонскяй и Запорожскяй областтнень эса Российскяй Федерацияти сувамаснон колга референдумть ётафтоманц ширенц кирдеманцты. Тысячелетиянь площади пуромкшнесть 5 тёжятть ломань, конат ащихть братскяй нароттнень, марстонь историческяй ётай пингть и стабильнай сай пингть инкса. Патриотическяй акцияса примасть участия Саранскяень эряйхне и инжихне, студенттне, государственнай и общественнай деятельхне, организациянь работникне.
«Лама киза Донбассонь ломаттне эряйхть стакадонга стака условияса. Шавондовихть аватне, сиретне, шабатне… И мекольдень пингть тя тиендеви коль сяда и сяда сидеста. А шавондовихть синь сяс, мес аш мяльсна эрямс националистическяй условияса. Сась пинге полафтомс семботь! Тячиень референдумсь—тя и минь референдумоньке. Минь Донецкяй, Луганскяй Народнай Республикатнень, Херсонскяй и Запорожскяй областень эряйхнень мархта марстонь унксоньке, марстонь историяньке, Великай Отечественнай войнань марстонь героеньке. И минь верондатама, што вяре азф региоттнень эряйсна примайхть видексонь решения. Синь кочкасазь Россиять, и минь марса карматама виияфнемонза великай странаньконь»,—мярьгсь Саранск ошень округонь депутатонь Советть Председателец Татьяна Шукшина.
Митингонь участникнень инголе стане жа корхтась ошень «Свято-Предтеченское» казачьяй обществань атаманць Вячеслав Жаров. Эсь корхтамасонза сон башка лоткась сянь лангс, што эрь ломанть эряфса улихть тефт, конатнень эзда ащи аф аньцек эсь судьбац, но и странанц эряфоц-ащефоц. Сяс пяк важна тиемс лац-ряц арьсеф аськолкс, конань инкса аф кармай визькс аф атяньконь-бабаньконь, аф сай поколениятнень инголе.
«Минь ащетяма историческяй видешить инкса!»—мярьгсь Вячеслав Жаров.
Депутатскяй корпусть эзда пуромфнень инголе выступандась Рузаевкань 8№ школань историянь и обществознаниянь учительсь, Мордовия Республикань Государственнай Собраниянь депутатсь Виктория Богдашкина.
«Мялезе азомс, што референдупне няфтьсазь ломаттнень мяльснон улемс пяльксокс лама национальностень российскяй народти. 2022 кизонь сентябрь ковонь событиятне кемоста сувайхть мировой историяти. Пара мяльса минь примасаськ Запорожскяй и Херсонскяй областень, Луганскяй и Донецкяй Народнай Республикань эряйхнень решенияснон мрдамс куду! Тя аф тёждя пингть тейнек эряви кирдемс марса! Эряви улемс великай Россиянь фкя аф сяськови народкс!»—мярьгсь Виктория Богдашкина.
Од ломанень сообществать эзда сявондсь вал Мордовия Республикань Од ломанень Правительствать Председателец Виктор Гущин.
«Сембе минь ащетяма свидетелькс историческяй важнай событияти. Аф ваномок сянь лангс, коса минь работатама, эрятама, оттама или эряфкшуфтама, сембе шарьхкотькшнесаськ ётафтови референдупнень важнайшиснон. Донецкяй, Луганскяй Народнай Республикань, Херсонскяй и Запорожскяй областень эряйхнень мяльсна эрямс сетьмошиса. Народоньконди аф весть сашендовсь васетькшнемс оцю стака-сталма мархта. И, кода няфнесы историясь, тейнек вийс коре сяськондемс синь. Конешна, сяськондематнень аш кода сатомс марса апак киртть. Тянь колга мяляфтома тячивок!».
Мордовиянь Профсоюзонь федерациять председателенц заместителец Сергей Губарев азозе, што референдупнень ширеснон кирдеманц колга лама корхнемада ульсь республикань предприятиятнень и организациятнень эса. Сон лувозе рабочайхнень мархта примаф резолюцияса тяштьфть.
Митингть пингста кайгсть патриотическяй морот, конатнень моразь Мордовиянь творческяй коллектифне.
О.ЕВДОКИМОВА.