Мишендись-логистсь юмафтсь ниле миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть эзга 1№ полициянь отделть дежурнай частезонза пшкядсь ошень эряйсь, кона пачфтезе, што салазь сонь 4302637 цалковаенц.
34 кизоса авась азозе, што тяддень майста «Вконтакте» социальнай сетьть вельде «Знакомства» сервисса сон содафтсь цёра мархта. Од ялгац пачфтезе, што шачсь Курск ошса, но тяни эряй Испанияса. Корхнесть лама темас коре, а меле цёрась кучезе авати скриншотть, коса няфтьфоль биржаса ётафтф сделкать колга информациясь. Сонь марстонь питнец 3 тёжяньда лама доллар. Авась азсь мяль добувамс тяфта, но ашельхть тя тевса содамошинза и лездыец.
Цёрась мярьгсь, што тонафтсы добувама, но авати васенда тевс сувафтома 24 процентсь добувафонц эзда ковть результатонзон коряс. Тяда меле содафтозе авать бта «биржань несколька сотрудник» мархта. Сят пачфтезь, што лама ярмакнень добувамаснон инкса стартовай суммась 500 доллар. Авась ашезь атказа тянь эзда.
«Биржань сотрудникнень» условияснон тиемда меле авась ётазень регистрациять и верификациять. Меле, штоба получамс сяда лама ярмак, сон коль сувафнезень тевс эсь средстванзон, а нинге сявсь несколька кредит инвестированиянди. Тяфта авась ётафтсь аферисттненди 4 миллиотт 300 тёжянь цалковай.
Мзярда мошенникне лоткасть теенза отвечсемда, авась шарьхкодсь, што повсь килькшезост и пшкядсь полицияв.