Мобилизованнайхнень семьяснонды макссеви сембе ширдень лезкс

Кафкса кофт ни ётасть, кода Донбассонь модать лангса ушедовсь специальнай военнай операциясь. Афкуксонь геройкс тиендьсазь инголест путф задачатнень, вятихть тюрема и мокшэрзянь масторста эсь мяльс туфне, Росгвардиянь и силовой лия ведомствань представительхне. Валом-валом ётафневихть передовой участкатненди и мобилизованнайхне, конат тяда инголе учебнай центратнень эса ётасть тактическяй и практическяй занятият.
Торбеевскяй районцта специальнай военнай операцияса примай участия ведьгемоньда лама мобилизованнай, конат эсь пингстонза служасть Российскяй армияса, ульсть танкистокс, артиллеристокс, связистокс, шоферкс. Сембонь мархта районнай администрациясь кирди соткст, мяльс сявондевихть синь эняльдемасна.
—Эрь мобилизованнайть лядсть тядясна-алясна, семьясна, конатненди районнай администрациясь марса предпринимательскяй сообществать мархта макссихть лезкс,—азонды Торбеевскяй муниципальнай райононь администрациянь оцюнять заместителец Николай Николаевич Киреев.—Кепотьксонди, октябрь ковста минь лездоме Мальцево велеста Ирина Эрекайкинати кудозонза уштомань системань нолдамаса. Сонь мирдец васенцетнень ёткса азсь мяль примамс участия специальнай военнай операцияса, а куду лядсть рьвац и ёмла идняц. Тяни тя семьясь тялоть ётафтсы лямбе кудса. А вов Насакино велень мобилизованнайсь Владимир Ермошкин тумстонза эняльдсь лездомс модань участкань оформляндамаса. Кизефкссь пяшкотьфоль недялянь потмоса. Тяда башка, макссеви лезкс мобилизованнайхнень эряфкшу тядяснонды-аляснонды. Рамсевихть лекарстват, кудонь жуватанди сёра, тише, лия кормат. Сембе мобилизованнайхнень шабасна, конат тонафнихть школаса, анневихть питнефтома. Вятевихть и лия работат, фкявок кизефкс апак ватт аф лядонды, синь пяшкотькшневихть нюрьхкяня пингть.
Н.Лобанов.