Азонттама Кадошкинскяй райононь Адаж велеста Петурофнень идьснон колга
Кадошкинскяй райононь Адаж велеса улемстонк сувсеме тястонь мокшавать Ираида Радаевать ширес. И эрявсь вдь тяфта угадямс, што тя пингть Ираида Ивановнанди инжикс сашендсть сонь аканза и сазоронза. Пара ульсь мялезонк, вдь повоме мокшень кялень, коень кельги и ванфты ломаттнень ёткс. Ираида Ивановна васьфтемазь пяк лац, сяс курокста араме содафокс и эсь, и радня ломанензон мархта.
Акатне-сазорхне Петуроватне шачсть лама идень семьяса. Тядясна, Софья Дмитриевна, и алясна, Иван Михайлович, касфтсть кота стирьхть и колма цёрат. Мирттне-рьвятне Петурофне—кафцьке Адаженнет, эряфоньберьф эрясть шачема велеса, покодсть виень аф ужяльдезь. Сембе шабасна арасть шнама ломанькс. Ужяль, пингта инголе эряфста тусь Петурофнень цёрасна Пётр Иванович.
Тяни ниле акатне-сазорхне и кафта браттне эряйхть Адажса, а кафта акатне-сазорхне—Кадошкинаса.
Тячи оцю мяльса азонттама колгаст.
Петурофнень оцю стирьсна—Раиса Шичкина лама киза работась траксонь потьникс велень колхозса. Жуватань мельге якайкс ульсь Раиса Ивановнань сазороц Лидия Шиндякова. А траксонь потьнемась, вазнянь мельге якамась—тефне аф тёждятнень эзда. Тияк эрявсь кенеремс кудонь тефнень мархтовок. И синь сембоса сафнезь. Кафцьке мокшаватне—лама идень тядят.
Валентина Ивановна пекарнянь заведующаель. Адажень пекарнясь оцюволь. Кши усксевсь и шабра велетненди. Пенсияс Валентина Самсонова тусь дояркань вастста. Траксонь потьнема сон ушедсь пекарнять пякстамдонза меле. Ули кода азомс, што Раиса Шичкина, Лидия Шиндякова, Валентина Самсонова эряфснон лемдезь Адажти, колхозти, жуватань касфнемати. Синь мокшават-труженицат, а нинге—пара вайме, родной кялень, коень-обуцянь ванфты ломатть.
Ираида Радаева школать шумордамдонза меле ушедсь работама колхозса, поступась Краснослободскяень велень хозяйствань техникуму, кочкамок агрономонь профессиять. Меле тонафнеманц поладозе Н.П.Огарёвонь лемса Мордовскяй государственнай университетонь экономическяй факультетса.
Мрдамок Адажу, аф ламос покодсь агрономкс, а целайнек эряфонц оцю пяльксоц—комозьда лама киза—сотф экономистонь тевть мархта. 1995 кизоня Ираида Ивановна ётась велень Совету бухгалтеркс. И тясовок сембоса сафтозе, сяс мес тевонц тиендезе маштозь, оцю ответственностень марязь. Эрь вастса тяфта работама, а кда сон сотф бухгалтериять мархта, коса аф ся вастти путф фкя цифранясь вяти оцю эльбятьксти—сядовок. Ираида Ивановна тянь лац шарьхкотькшнезе, сяс и работанц результатонза фалу кеняртьфнесть.
Ломаттневок няезь цебярь специалистть виень аф ужяльдезь трудендаманц. Пингонь ётазь Ираида Радаевать кочказь Адаж велень поселениянь оцюнякс. Кемонь кизот мокшавась покодсь тя вастса. Самай эста показательхнень пяшкодемаснон инкса эрявсь работамс населениять мархта, конань кядьста кочксевсь лофца, сиволь. Лама тифоль Адажу газть ётафтомстонза. Тяфтама ломаттнень, кода Ираида Ивановнань, мархта корхнемста арьсезеват и саят мяльс: улема, аф пяк видет ся валхне, што аватне—лафча (рузкс азса «слабый пол») ломатть. Кда улель тяфта афкукс, афоль сафтов тейнек мезьсовок. Сембось меколанкт: аватне (тяконь лувксса и мокшаватне) кодамовок тевда аф пелихть. Кда ни «веляфтозь» лафтуснон лангс «стака канксть»—тевть, то аф ёрдасазь сонь, а кандсазь коза эряви. И тисазь тянь апак пеняцяк.
Ираида Радаевась главнай бухгалтероль Кадошкинаса социальнай защитань отделса, коста и тусь пенсияс. Работанц поладозе сяда тов, но стакаста сярятькстсь мирдец Николай Митрофанович, сяс работанц савсь кадомс. Но эсь тевонь содай, асу эрь специалистти вешфкс ули фалу. Тяфта лиссь и мокшавать Ираида Ивановнань мархта. Адаж велень поселениянь оцюнякс ушедсь покодема Виталий Киселев, а мокшавать тердезь бухгалтеркс. Кафкса кизот сон тя вастсоль.
Мирденц мархта мокшавась шачфтсь-касфтсь колма шабат-стирьхть. Сембе синь кассть шнама ломанькс, музь вастснон эряфса. Инь оцюсь эздост, Галина, специальностьс коре журналист, аф фкя киза работась газетатнень эзда фкаса.
Журналистонь тевти эряфонц лемдезе и Петурофнень стирьсна Людмила Ивановна.
Людмила Ефимочкинать лемоц лац содаф Кадошкинскяй райононь эряйхненди—«Возрождение» газетать лувиензонды. Районнай газетать редакцияса сон работась 36 киза.
Браттне Петурофне—Михаил Иванович и Александр Иванович трактористтольхть. Синьге сотозь эряфснон ёмла родинать—Адажть мархта, коса эряйхть тянемс.
Кадошкинаса эряй Петурофнень нинге фкя стирьсна—Анна Попкова. Ужяленди, тя шиня сон ашель Ираида Ивановнань ширеса.
Азома сявок, што 2024 кизоня, эста нинге шисоль тядясна, Софья Дмитриевна, мокшень трудонь кельги тя семьясь чествовандафоль оцю сцена лангса. Петурофненди максфоль премия, лемозост азфоль лама лямбе вал.
Софья Дмитриевнань и Иван Михайловичень сембе идьсна кассть шнама ломанькс. Тяфтамкс касфтозь и эсь шабаснон. Пцтай сембонь тяни улихть уноксна, конат сашендыхть ширезост. Кда тяштемс колгаст и семьяснон квалма сяда келиста, аф шта газетань лопанясь аф саты, а журналу несколька очерк лиси. Сяс, пингонь ётазь, мрдатама Петурофнень идьснонды, а тячи мяленьке нинге весть азомс, што синь—мокшень кялень кельги и ванфты ломатть. Сембе акатнень-сазорхнень мазыхть вайгяльсна, мокшаватне содайхть мокшэрзянь аф кржа мора.
Лама анокт азондомс Адажень мокшаватнень национальнай щамснон-карямснон колга. Тяфтама нарядоц ули и Ираида Ивановнань. Мокшавась—«Чивгокскя» велень фольклорнай ансамбльть руководителец. Коллективсь, теенза колмогемонть малава киза, примси участия велень и райононь сембе илатнень эса, «Шумбрат, Мордовия!» Народнай творчествань республиканскяй фестивальса. Ломаттне оцю мяльса кулхцонкшнесазь «Чивгокскять» моронзон, а нинге—ванондсазь мокшаватнень-баяраватнень (эздост тяни вейхкса ломатть) мазы щамснон.
Монга эняльдень Ираида Радаевати щамс-карямс мокшавакс и азондомс Адажень нарядть колга. И сон тянь тиезе оцю мяльса. Да нинге кода! Васенда моразе «Роман Аксясь» содаф мороть, а аканза-сазоронза лездсть теенза.
Адажень мокшавать щамоц пяк мазы. Мезьста сон ащи? Вал макстама Ираида Ивановнанди.
«Ушедсаськ вярде. Мокшавась прязонза соты шуваня руцяня. Мезенди? Улема, штоба оцю руцясь афоль ливоськода и афольхть ола панчфонза. Оцю руцять ланга сотома ашкотф—ожнаста тиф мазоптомбяль. Сяда тов моли панарсь, перьфканза сотовихть каркс пети сёконят. Панарть ланга щашендови сапонясь. Сапоняда меле—баяравань крганясь, лапаскясь—сяда ёмла мазоптомбяльсь и, конешна, повфневихть крганят. Мокшаватнень пильгса кеме цюлкат, кямот»,—азондсь сон.
Но, конешна, тяфтама щамть эрявсь няемс эстейть. Конашкава мазыхть и келихть панарть петьксонза! Сельмоце аф явфтови баяравань крганять эзда!
Лама лятфнемада акатне-сазорхне Петуроватне пачфтсть тядяснон, Софья Дмитриевнань колга, кона асу ломанель авань кядьтевса. Котцесь котфт, сташендсь мокшавань панархт, сёрматкшнезень синь сюреса. И тиендезе тянь шра лангонь лампать валдонц вельде, сяс мес тол ся пингть куттнень эса ашель. И кенерькшнесь мокшавась! Траксонь потьникс работась, вейхкса итть касфтсь, кудонь тевса заняфоль, да нинге кодась и сюреса сёрмадсь.
Акатне-сазорхне аф прянь шнафтомга азозь: пцтай синь сембонь улихть мокшавань щамсна, а кой-кит мокшень кямоснонга ванфтозь! Кие тя тевса шарьхкоди, эстокиге талакоды: тяфтама пильгс щаматне васьфневихть тячиень эряфсонк пяк и пяк шуроста.
Ираида Радаевать ширеса улеме васенцеда, оцю мяльса содафтоме сонь и аканзон-сазоронзон мархта. И няеськ, конашка мяль Петурофнень идьсна шарфнихть семьянь питнишитненди, конашкава малат синь фкя-фкянди. Касомок лама идень семьяса, мокшень ня ломаттне эряфоньберьф васенце вастти путнесазь фкя-фкянь шарьхкодемать, фкя-фкянди лездомать. Синь мзярдовок ашесть панце оцю ярмаконь мельге, виень аф ужяльдезь покодсть шачема велеса—Адажса. И мзярдовок киндивок ашесть пеняця эряфснон лангс! Вов и тейнек мярьгсть: «Шумбратама и пара! Мезе нинге эряви?»
Арьсетяма акатненди-сазорхненди и синь мала ломаньцнонды кемодонга кеме шумбраши!
Татьяна АЛЬШИНА.
Фототне Николай КАРАНОВОНЬ.