«МОКШЕНЬ ПРАВДАСЬ» ПАЧКОТЬКШНЕСЬ ФРОНТУВОК

Вов мезе тянь колга азондсь-пачфнесь «Мокшень правдать» ингольдень корреспондентоц, Мордовиянь народнай поэтсь, фронтовиксь Илья Максимович Девин.
«…1941 кизонь 22 июньцта нолдафоль «Мокшень правдать» экстреннай номероц—войнань ушедома шинь, а ковда меле тейне кандсть повестка фронту.
Тяфта явонь родной газетазень мархта.
Ичкозьге якасть кине, а сонь ашине юксне: вдь мон работань эсонза! И пяк лажаткшнень теенза. Куду эрь сёрмасон энялькшнень, штоба кучельхть «Мокшень правданя». Кучсесть, да аф най: то, кле, изь пова кядезост, то тага кодамовок туфтал азондсть.
А 1942 кизоня, мзярда улень Калининскяй фронтса, лемозон сась кагод пусма. Панжине и эсь сельмоненди изень веронда—кемоньшка номер «Мокшень правда»! Кучезень «Эрзянь коммунань» фкя сотрудница,—фамилиянц юкстайне, а лемоц Мария. Кенярдень аф азовомшка.
Минь частьсонк ульсть мокшетка—аф ламоль, но ульсть. Ётксост эстонь Сире Синдрунь районцта Николай Александрович Романов, старшай лейтенантсь—танкистсь. Няфтине теенза газетатнень—сонга кенярдсь, да сияк кизефтемань: тяшнян али аф тоза «статейканят».
—Аф,—отвечань.
—А мес? Азонтк мокшетненди, кода тюрихть минь боецоньке фашисттнень каршес…
Тяда меле кучине «Мокшень правдав» фронтовой васенце зарисовказень «Бронть лангса ломань»—Романовонь квалма. Танкистсь сон боевоель, смелаель. Газетась печатлазе зарисовказень, и ся номерть казине танкист-землякозти.
Сонць И.М.Девин войнань толу китнень-яттнень эзга пачкодсь мянь Берлину. Родинать араламанкса Илья Максимович казьфоль Якстерь тяштень, Отечественнай войнань орденца, лама медальса, а творческяй и общественнай тевонзон инкса—Трудовой Якстерь Знамянь и Народонь ялгаксшинь орденца, медальса. Но инь оцю казнекс теенза ульсь сембе народонь кельгомась.