«Мокшень правдась» сатсь казне

Ётай недялять, 24 январьста, Мордовия Республикань Государственнай Собранияса ётафтовсь торжественнай пуромкс, конань пингста казьфтольхть «Закон и власть» конкурсонь сяськихне и призёрхне. Синь ётксост республиканскяй и районнай газетань, теле- и радиоканалонь, информагентствань журналистт, конат кизоньберьф няфнезь региональнай парламентть работанц.
Госсобраниять Председателец Владимир Чибиркин китькстазе, што прессась пяшкотькшни социальнай оцю задача, азонкшнемок законодательствать эса полафткснень колга. 30 кизоста регионца примаф 2800-та лама закон, конат тисть путкс республикать виияфнеманцты. Пуроптф нормативнай база экономикать сяда тов кемокснеманкса, граждаттнень эряфснон цебярьгофнеманкса. «Сембось тя мушенды васта тинь материалонтень эса, конат аф аньцек няфнесазь событиятнень, но и кепсихть ломаттненди важнай кизефкст. И эрсь эздонтт, ули кода мярьгомс, тяшти история»,—мярьгсь Владимир Чибиркин.
Тяниень пингть фкя инь главнай задачась—специальнай военнай операциять целензон сатомасна. Мордовиянь СМИ-тне тянь эса активнайста лезнихть. Госсобраниять Председателец азсь мяль ладямс журналистскяй конкурсонь од номинация—«На службе Отечеству», кона лемдеви государствать араламаса республикань эряйхнень участвовандамаснонды, историческяй мялямть ванфтоманцты синь путксснонды.
Васедемаса Владимир Чибиркин спасибась СМИ-нь сотрудникненди профессиональнай трудонкса. Макссь казнет «Государственнай Собранияти—30 киза», «Республиканскяй газетатне», «Районнай газетатне» и «Инь цебярь журналистскяй работась» номинациятнень коряс. Пара мяльса азсаськ, што «Республиканскяй газетатне» номинацияса «Мокшень правда» газетась занязе омбоце вастть.
«Семьянь кизоня и Трудовой династиянь кизоня депутаттнень работаснон няфнемац», «Электроннай СМИ-тне» и «Фотокорреспондентонь/видеооператоронь инь цебярь работась» номинациятнень коряс конкурсонь участникненди диплопнень максозень МР-нь Госсобраниять Председателенц заместителец Наталья Долматова.