26 декабрьста Мокшэрзянь национальнай драматическяй театраса ётафтовсь торжественнай пуромкс, конань пингста казьфтольхть Мордовиянь Журналистонь союзть конкурсонзон эса сяськихне.
Пуромксть вятезе Союзть председателец Людмила Резяпкина. Стане жа каземань церемонияса примасть участия Мордовия Республикань Оцюнять и Мордовия Республикань Правительствать Администрацияснон информационнай политикать коряс Управлениянц начальникоц Альбина Симакина, филологическяй наукань докторсь, Н.П.Огарёвонь лемса МГУ-нь журналистикань кафедрань профессорсь Вера Антонова и Российскяй Федерациянь Заслуженнай журналистсь Дмитрий Божедаров. Конкурснай комиссиянь члеттне азозь творческяй работань инь цебярь авторхнень лемснон республиканскяй вете пялькстомаса: велень хозяйствань темать инь лац няфтеманкса А.Т.Куняевонь лемса конкурсса, Г.С.Власовонь лемса фотоконкурсса, «Да» интернет-состязанияса, ветераттненди «Золотое перо» конкурсса.
Сяськихненди и призёрхненди максфтольхть диплопт и ярмаконь премият.
Пара мяльса азсаськ, што казьфнень ёткса и минь редакцияньке. «Мокшень правдась» сувась велень хозяйствань темас конкурсонь призёрхнень лувксс.