«Мокшень правдась» сатсь казнет

15 декабрьста Мокшэрзянь национальнай драматическяй театраса ётафтовсь мероприятия, конань пингста тифтольхть итокт Мордовиянь Журналистонь союзть конкурсонзонды.
Мордовиянь Оцюнять Артём Здуновонь лемста журналисттненди пара валхт азсь МР-нь Оцюнять и МР-нь Правительствать Администрацияснон Руководителенц заместителец—Мордовия Республикань Оцюнять пресс-службанц руководителец Елена Башкирцева.
—Всероссийскяй эрь-кодама конкурсса Мордовиянь журналисттнень сяськондемасна кемокснесы синь профессиональнай асушиснон оцю серенц. Тячи минь казьсаськ цебярьхнень ёткста инь цебярьхнень, кинь работаснонды макссь оцю оценка жюрись, а главнайсь—кинь работасна тусть лувихнень, ваныхнень, кулхцондыхнень мяльс!—мярьгсь Елена Васильевна.
Сон шарфтсь мяль, што республикань журналисттне—асу ломатть и спасибась теест оцю, важнай работанкса, конань синь тиендезь кизоньберьф.
Пара мяльса азсаськ, што казнет сатсь и минь газетаньке. Фотокорреспондентоньке Николай Каранов сяськсь Г.С.Власовонь лятфнеманкса фотоконкурсса! Газетать главнай редактороц Ольга Евдокимова сувась Социалистическяй Трудонь Геройть А.Т.Куняевонь лемса велень хозяйствань темас конкурсонь призёрхнень лувксс.
Ольга Колединова.