«МОКШЕНЬ ПРАВДАТЬ» ТЯШТЬФНЕСЫ 42 КИЗА!

Аф кунара улеме Ковылкинскяй райононь Малав мокшень велеса. Саранскяйть эзда сон ащи аф пяк мала вастса. Но, мзярда васедеме тястонь эряйхнень мархта, корхнеме седикс-ваймокс, эстокиге шарьхкодеськ, тянкса ули кода ардомс нинге сядовок лама вайгяльбе. Аш месть корхтамс, Малавонь ломаттне—инжиень примайхть, мокшень кялень, мокшэрзянь моронь, коень-обуцянь кельгихть и ванфтыхть. А нинге—оцю мяльса сёрматфнесазь масторлангса мокшень кяльса лисенди фкя-сяка газетать! Кой-кит тянь тиендьсазь кизоста кизос. «Рекордсметтнень» ёткс сувси мокшавась Валентина Тюрькина.
Валентина Андреевна «Мокшень правдать» тяштьфнесы вов ни 42 киза! Кода сонць азозе, ялгакс газетать мархта арась рьвакс тумдонза меле эстокиге. Пингонь ётазь ялгаксшинь сотксне коль кемокснесть.
Валентина Тюрькина шачемас коре Малавста. Родной велеста тушендсь аньцек весть—тонафнема. Меле мрдась ёмла родиназонза, эвондась семьяц. Пцтай нильгемонь киза заведующаель медицинскяй пунктса. Тяни пенсияса, но тевфтома ащикс сонь лемдемс аш кода. Вов и «Мокшень правдать» коллективстонза сафнень мархта васедемаса примась участия. Эняльдеме мокшавати азомс мялензон-арьсеманзон газетать колга.
—Кельгома «Мокшень правдать» сёрматфнеса пяк и пяк лама киза. Инголи эрянь оцю семьяса—атявозь и авозь мархта. Мярьгонь, што мокшетненди аш кода родной кяльса лисенди изданияфтома. И ушедонь сёрматфнемонза. Кизонда, мзярда лямболь, лисендень ульцяв и скомнятнень лангс озсеф эряфкшу ломаттненди кайгиста лувондыне мекольце номерста инь мялень салай материалхнень. Мокшекс морафтомась ульсь и лядонды тейне кельгома тевнень эзда фкакс.
—Валентина Андреевна, кодама материалхнень газетаста морафнесайть васенцекс?
—Мялезон тушендыхть сембе. Сай «Мокшень правдать» од номероц, педа-пес ванца сонь, а сяльде ушедан морафтома. Конешна, аф эстокиге лувондса марнек газетать, тиендьса тянь несколька шиста. Тяфта сяда лац примави уликс информациясь.
—Лама киза максоть ломаттнень шумбрашиснон ванфтомаснонды. Сяс, улема, сатомшка мяль шарфнят пчкафтомать мархта сотф советтненди и рецепттненди?
—Синь пяк и пяк эрявихть. Аньцек тевс нолямат маштозь, врачть мархта корхнемда меле.
—Мезе, койсот, аф сатни «Мокшень правдаса?»
—Кизефксцень лангс отвечан вов кода: тейне сатни сембось, аньцек пяк пара улель, кда сяда сидеста максселеде мокшень морот—кунардоннет и тяниень пингоннетневок афольхть шоря.
—Спасиба, Валентина Андреевна, лямбе корхнеманкса. Эняльдемацень сявсаськ мяльс и пяшкодьсаськ!
Татьяна АЛЬШИНА.