Мокшэрзянь крайста комсь доброволецсь тусь Донбассу

Тонафнемань од кизоти ляткшни недяля. Мзярс шабатне ваймосесазь мекольце шитнень, тядясна-алясна ласькондихть лавкатнень ланга, рамсесазь сянь, мезе нинге ашесть кенере рамамс и лувондсазь, мзяра цалковай савсь таргамс зепстост, штоба анокламс стирьснон-цёраснон школати.
Цифратне лисендихть аф ёмлат. Кода няеви, ётай кизоть коряс тядде сембе эрявикс паршихне питниясть коса 12, а коса и 20 процентта. Нинге июль ковста эксперттне надияфнесть, што инь ёмла школьнай наборть инкса сави пандомс 14 тёжянь цалковайть малава. Лятфтасаськ, тя наборти сувихть канцтовархне, тетраттне, рюкзаксь, школав якаманди щамсь и карсембяльсь. Сонь питненц лувомста сявондевихть мяльс сембодонга уцез товархне. Аньцек кржа кие эряскоды рамамс шабанцты 4-5 цалковайда тетрадь, конань уле, шуваня лопанянзон пачка каршек ащи ломанць няеви. Тяфта и семботь лиять мархтовок. А сяс ламоц тядятнень-алятнень валснон коряс, конат тя пингти кенерсть ни кочкамс эрявиксть, вяре азф ярмакне сатсть аньцек эста, кда шабати тядде ашезь сав рамамс аф од школьнай форма, аф од рюкзак. Лиякс азомс, канцтоваронди, рабочай тетраденди, карсембяленди, носоконди-колготканди. А сятненди, конатнень ёмлалгодсь формасна или таштомсь рюкзаксна, савсь карьхцямс тага 10 тёжянь цалковайть малава.
Сембодонга пяк тядде питниясть школьнай дневникне—46 процентта. Канцелярскяй наборхнень питнесна кассь 35, школьнай формась—17-20, туфлятне и ботинкатне—23 процентта.
Тяни республикасонк, кода и марнек странаса, аш марстонь школьнай форма. Эрь школать сонцень вешфксонза. Стирнятне каннихть палят и фартукт, кие сарафатт, кие юбкат, блузкат. Цёранятне—пиджакт, жилетт, панархт, брюкат. Сембонь питнесна аф фкя лацоннет. Платья лаца формать ёмла классонь тонафнихненди ули кода рамамс 1700-2000 цалковайда, оцю классоннетненди—2500 цалковайда. Акша и равжа фартукнень инкса сави пандомс 1000-1300 цалковай. Нинге аф юкстамат воротниконятне. Тя тага 350-500 цалковай. Цёранятнень щамснон инкса сави пандомс: пиджаконкса 1500 цалковайста, брюканкса 1000 цалковайста сявомок и сяда лама. Сарафаттнень питнесна 3000-3600 цалковай, блузкатнень, панархнень—500-1500 цалковай. Стане жа эряви физкультуранди форма. Тя тага 1500-3000 цалковай. Пильгсщаматневок мяльса кирдемат. Эрявихть туфлят, полафтоманди карсембяльхть, физкультуранди кроссовкат, школав пачкотькшнеманди карсембяль. марса лиси инь кржась 4000-5000 тёжянь цалковайть малава. Шарьхкотьф, сембе ня цифратне сявфт средняй питнетнень мяльса кирдезь. Кепотьксонди, рюкзак ули кода рамамс 1000 цалковайда. Аньцек ламос-аф саты тяфтама уцез паршись, лац ли кармай канневома шабати? А сяс тядятне-алятне старандайхть рамамс сянь, мезсь сяда цебярь. А синь питнесна август ковста ульсь 4000-6000 цалковайть малава.
Ламоц тядятне-алятне, кирдемок мяльса сентябрь каршень питниямать, тяряфнихть рамсемс семботь, кепотьксонди, нинге тунда. Шарьхкотьф, формать и ботинкатнень тяфтама рана аф рамасайть, вдь касыхть шабать пильгоц и ронгоц. А вов рюкзакнень и канцтовархнень—мес ба аф. Путыть шкафу и катк ащихть.
Кой-кит, а тяфтамда арси коль сяда лама, сембе эрявиксть рамсесазь аф базарста-лавкаста, а интернетста. Маркетплейснень и онлайн-лавкатнень эса, кле, товархне сяда уцест и ласькондемска козонга аф эряви.
Школав шабать кочкамста мяльс сявомат гаджеттневок. Смартфонць, ёню часттне эрявихть, штоба ваномс шабать мельге, содамс пачкодсь-аш сон школав или мрдась-аш куду. А нинге тяни ламоц школатнень эса тевс нолявихть электроннай дневникне, коса учительсь сёрматкшнесы кудонь тевть. А сяс ули-аш мяльце—телефон идти рамама сякокс. Кодама питнеда, арьсесазь синць, тряйхне-касфтыхне. Сяда цебярьхнень ёткста сембодонга уцезть питнец 10 000 цалковай.
И аф юкстама панчфонь пусмоть колгавок. Кодама васенце сентябрь панчфтома! Сембода пяк, кда шабась моли васенце классу. Азомс, што тяни аф каннихть эсь переса касфтф астрань, гладиолусонь, георгинонь и лия панчфонь пусмот, аш кода. Каннихть, и сатомшка сидеста. Аньцек аф сембонь, ужяленди, кизонда ульсь пингсна озафнемс панчфт-месть, а сяс сашендови рамсемс синь лавкаста. Сембода уцесне хризантематне. Крафтовай кагодса ашкотф пусмонясь стяй 650-750 цалковайс, а роза и лия панчф мархта пусмонкса сави карьхцямс 1300-2300 цалковай.
И. ФАДЕЕВА.

Нинге специальнай военнай операциять ушедомда инголе Донбассонь Доброволецонь союзть мялень азоманц коряс ушедсть пуропневома добровольческяй соединеният. Синь ащесть каршек укронацистскяй режимти и шиста шис няфнезь эсь эффективнайшиснон. СВО-ть азомда меле тяфтама батальоттнень пуроптомасна поладовсь. «Ахмат», «Юг», «Тигр», «Боотур», «Атал», «Парма», «Тобол»—тяни именной отряттненди поладсть Мордовиянь национальнай подразделениятне—«Сияжар», «Аралай», «Кавал».

Именной батальоттне пуропневихть контрактс коре. Организационнай лезкс добровольческяй подразделениятненди макссихть тястонь власттне.
Республикань руководствась ладясь пандомат ломаттненди, кинь ули мялец примамс участия Донбассть араламаса. Решениять примазе МР-нь Оцюнясь Артём Здунов. Минь земляконьке получайхть дополнительна 150 тёжянь цалковай.
Республикастонк доброволецонь, лувксс коре сисемце отрядсь Рузаевкань сборнай пунктста прважафоль 15 августста. Нинге комсь алясь, марямок эсь вийснон, сизесть ванондомс событиятнень мельге кулянь выпускнень эса. Синь састь мяльс лездомс, сяс мес шарьхкотькшнесазь, цёраньконди передовойса стака.
—Минь пяшкотькшнесаськ эсь долгоньконь, аралакшнесаськ Родинаньконь—тя фкясь, аралакшнесаськ Украинать нацисттнень эзда—тя омбоцесь,—нюрьхкяняста азозе доброволецсь Алексей.
45 кизоса алять оцю мялец эрямс вии, киньге эзда аф ащи странаса, кемоста стямс пильге лангс и касфтомс эсь шабанзон достойнай ломанькс. Тянкса эряви сяськомс, мезсь сатови аньцек марстонь вийса.
Доброволецне—тя, васендакиге, патриотт. Ётксост Михаилсь—депутатонь Саранскяй Советонь депутатсь. Эсь 37 кизосонза теенза ульсь кода поладомс карьеранц и мольфтемс общественнай тефт, кошярямок сембонь кельгомс Отечествать аньцек валса. Но сонь мялец няфтемс тя кельгомать тевса.
—Пингсь сась. Мон марян гордость сянкса, мес аран пяльксокс Мордовиянь национальнай подразделениятненди. Карман старандама лац-ряц пяшкотькшнемост боевой заданиятнень,—азозе Михаил.
Вячеславонь военкоматонь куцеманятнень лангса прважазе цёрац Иван. Вов тяфтама пингса эрятама. Цёрокшсь няевсь сядонга таколдозь алянц коряс. Вячеслав, меколанкт, ащесь кемоста.
—Решениясь примаф. Лиякс мезе лисенди, атяньконь инкса гордость марятама, а минць пельхтяма? Тянди аф улемс,—мярьгсь Вячеслав.
Напутствиянь валхт доброволецненди азсь МР-нь Правительствать Председателенц васенце заместителец Игорь Фрейдин. Сон китькстазе, што земляконьке тячи тиендихть афкуксонь алянь тефт.
—Тинь тиесть тя аськолксть—и сон пяк питни. Эсь ширденк надияфнетяма пяшкодемс сембе обязательстватнень и кирдемс ширентень. Ученттядязь шумбраста-тазаста. Ванфтость прянтень,—мярьгсь Игорь Фрейдин.
Мордовиянь военнай комиссарсь Игорь Тихомиров, торжественнай прважамать шумордамста, лятфтазе, што Украинаса Российскяй войскатне тиендьсазь мировой историять.
—Тоса тиендевихть библейскяй масштабонь тефт. Няфтесть теест, кие тяфтамсь Мордовияса шачфсь-касфсь! И мрдада, тинь эряфтада эсь ёмла родинантенди,—азозе Игорь Тихомиров.
Стройста кеме и кайги вайгяльса фкясь азозе сембонь инкса:
—Мрдатама! Тяса минь кудоньке, но тосовок брадоньке.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии внедрен безбумажный электронный документооборот

В рамках регионального проекта «Цифровое государственное управление» национального проекта...

Предпринимателей Мордовии научат создавать короткие видео-«REELS»

Министерство экономики, торговли и предпринимательства РМ совместно с Центром...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...