24 августста Старошайговскяй муниципальнай райононь Сире Теризморга велеса, Национальнай культурань районнай центраса, ётафтовсь Мордовскяй (мокшень и эрзянь) народть Межрегиональнай общественнай организациянц Исполкомонц выездной заседанияц. Вятезе сонь организациять председателец Юрий Мишанин.
Исполкомть заседаниянц участниконзонды приветственнай валхт азсь Старошайговскяй муниципальнай райононь оцюнясь Геннадий Мухин. Геннадий Александрович арьсесь пуромфненди лац-ряц работамс, ваномс шинь повесткати сувафтф сембе кизефкснень. Нюрьхкяняста пачфтсь, кода молихть тефне Старошайговскяй районца.
Шинь повесткати сувафтфоль несколька кизефкс. Васенцесь эздост лемтьфоль Мордовскяй (мокшень и эрзянь) народть Межрегиональнай общественнай организациянц VIII-це съездонцты, кона ётафтови Саранскяйса тяддень 9-11 октябрьста, анокламанцты.
Юрий Мишанинонь валонзон коряс, Организационнай комитетсь пуроптф, теенза председателькс кочкаф Мордовия Республикань Оцюнясь Артём Здунов.
Малаткшни съездть темац тяфтама—«Консолидация мордовского народа и укрепление единства российской нации в условиях современных вызовов».
Тяниень пингть мольфтеви документтнень и синь проектснон лангса работась.
Юрий Александрович шарфтсь мяль, што сембе пуромксне тяниень пингть ётафнемат российскяй традиционнай духовно-нравственнай питнишитнень кемокстамаснон мяльса кирдезь. Тянь путома васенце вастти.
9 октябрьста Саранскяи ушедыхть сашендома съездонь делегаттне, инжихне. Ётафтови Исполкомть заседанияц. Ширде сафненди аноклавихть «Шумбрат, Саранск!» экскурсият. Илять ётафтови «Траектории жизни и творчества национального композитора. Творческий вечер Нины Васильевны Кошелевой» лем ала мялень салай мероприятия.
10-11 октябрьста—съездонь васенце и омбоце шиня— ётафтови Пленарнай заседания. Пуроптовихть рабочай оргаттне, кулхцондовихть делегаттнень и инжихнень приветствиясна. Прважафт сёрмат содаф ломаненьконди. Пара ули, кда съездть работасонза примайхть участия аф аньцек делегаттне, но и синьге. Тя шиня тиевихть отчётнай доклатт, выступленият, кармайхть работама секциятне.
Исполкомть заседаниянц пингста корхтафоль съездти делегаттнень кочкамаснон колга. Вал максфоль региоттнень эзда саф национально-культурнай автономиянь представительхненди. Синь пачфтезь, што теест максф квотатнень коряс делегаттне кочкафт или кочкавихть маластонь пингть, тя кизефксть коряс прябалат аш.
Корхтафоль и «Шумбрат» илать колга, кона кемоста аськоляй странать келес. Тяддень сентябрьста сон васенцеда ули Челябинскяй областьса и Владимир ошса.
Мордовскяй (мокшень и эрзянь) народть Межрегиональнай общественнай организациянц Исполкомонц заседанияса ванфтольхть и лия кизефкст.
Татьяна АЛЬШИНА.