Мордовия Республикань Заслуженнай артисткась Инна Учватова: «Од кизось— тя семьянь ила»

— Инна Павловна, кодама васта тонь семьясот занци Од кизонь илась?
— Од кизось—тя, васендакиге, семейнай ила, мзярда сембе мала ломаттне пуромихть марс. Афкуксонь илась эста, мзярда ваймось ваймоти маласа. Тя шить фалу васьфнеса кельгома ломаннень мархта. Тячемс лятфнеса, кода алязе Од кизонь карша каннесь кузня, конань наряжакшнеськ семьянь келеса: сазорозень мархта повфнеме налхкшт, а алязе латцесь тяште. Тядязе аноклакшнесь шра лангс.
Од кизоти анокламась ушеткшнесь нинге школаса, мзярда тонафтыхне и тонафнихне арьсесть сонь ётафтоманц лангса. Школаса морсень сембе илатнень пингста и, конешна, Од кизоста.
—Кодама казнесь арась инь лятфтавиксокс тя иласта?
—Шабакс пингозе ётась Советскяй Союзса. Тяниеннеть лаца лама танцтиняда лавкатнень эса ашель. Сяс минь оцю мяльса учендоськ ламбама казнетнень. Работама вастста «кулёкт» тейне и сазорозти каннесть бабазень мархта атязе и тядязень мархта алязе.
—14 декабрьста Мордовскяй государственнай филармонияса няфтьфоль «Любовь и голуби» музыкальнай театрализованнай постановкась. Ломаттненди сон кельговсь, залсь пяшксель. Азонтт аф лама концертнай тя программать колга.
—Тя постановкать няфтеськ ветецеда ни. Режиссёрсь-постановщиксь—Мордовия Республикань искусствань Заслуженнай деятельсь, Мордовскяй государственнай филармониянь главнай режиссёрсь Оксана Вишнякова. Сон лама киза работай мархтонк. Пяк пара мялезон, мес главнай рольть—Надежда Кузякинать героинянц—налхкине мон. Кельгса тя персонажть и «Любовь и голуби» кинофильмать. Примамс участия театрализованнай тя постановкать эса—афкуксонь казне. Мархтон марса налхкихть Мордовскяй государственнай филармониянь лия артисттне: Вячеслав Зобков, Анна Бегаева, Андрей Бочканов, Оксана Арбузова и Юлия Бегбаева.
—Мезе аноклай Мордовскяй государственнай филармониясь Од кизоти?
—Филармонияса Од кизонь «шиненясь» эвондась нинге 20 декабрьста, мзярда ладяськ и наряжаськ кузть. 21 декабрьста «Снежная волна» концертнай программазонк сашендсть инь ёмла инжиеньке. Няфтеме теест баснят. Лама киза тяда инголе налхкондонь принцессань рольхть. Тядде режиссёроньконь кядьста анань сяда серьёзнай роль. Сяс тядде Яга-Бабан. Тяка пингть аноклатама и Роштувань концертти, коза сувайхть 70-це кизонь морот и кштимат.
—Од Кизонь эсь лацонь гимнакс мокшень ломаттненди арасть «Од киза мархта!» и «Тялонь ки» моротне. Кода эвондасть ня композициятне?
—Ня моротнень морсесайне кунара ни. Сембода пяк синь кельговихть кулхцондыхненди Од кизонь карша. Кафцьке моротненди музыкать сёрмадозе содаф композитороньке Н.В.Кошелева. «Од киза мархта!» мороти валхнень арьсезень Рая Орлова, а «Тялонь ки» мороти—Владимир Нестеров.
—Арьсекшнят-аф маластонь пингть сёрмадомс мокшень од морот?
—Пяк кельгса мокшень моронь морамазень. Мокшаван, сяс репертуарсон синьфтомост аш кода. Пингсь няфтьсы, но тяфтама мяльне-арьсемане улихть.
—Рузаевскяй райононь Левжа велесь, коса шачеть-касоть, содаф мокшаватнень мазы вайгяльснон мархта. Кинь эзда тейть ётась морамань тя асушись?
—Пяк мазыель вайгялец щавазень. Сон 51 киза ни кода тусь эряфста, а морамань асушинц тячемс лятфнесазь велеса. Тядязевок морсесь художественнай самодеятельностьса, ульсь «Ару лихтибря» ансамблень активнай участницакс.
Левжа велеса шачсь-кассь Мордовиянь Народнай артисткась М.Н.Антонова. Шачеме мархтонза фкя шиня—24 августста. Тя эжнесы ваймозень эряфоньберьф.
Мзярда тейне ульсь 15 киза, кочкаме семейнай трио: тядязе, мон и сазорозе. Тядязе сявондезе вярдень вайгяльть, сазорозе—кучканнеть, а мон—алуцеть. Семейнай ансамблень республиканскяй конкурсса нльне сявоськ омбоце вастть. Кой-конат кочксесть 10 ломаньцта ансамбльхть, а минь улеме колмоненк. Тянивок иласта пуромкшнетяма марс Левжаса и морсетяма.
Ся пингста сявомок и тячемс тонафнян. Кода тядязе тейне мярьги—«сембе пингонь студент». 18 киза профессиональнай сцена лангсан. Морось тейне, кода кожф.
—Мезе арьселеть лувиеньконди Од кизоста?
—Арьсян сембонди эрямс ялгаксшиса! Мялезе, штоба сон казель шумбраши и паваз. Кеман, цебярь арьсематнень инкса мастороньке ули сяда валда, эсонза аф кармай васта тюрематненди и урматненди.
О.Белкина.