Пара койс коре 9 майста Мордовиянь Оцюнясь Артём Здунов лична поздравляндакшнесыне Великай Отечественнай войнань ветераттнень. Шобдавакиге региононь руководительсь гайфтсь ётай веконь 40-це кизонь ся пелькс событиянь колма свидетельхненди.
Ковылкинань эряйть Владимир Герасимович Костькинонь мархта Артём Здунов васетькшнесь тяддень февральста. Эста ветеранти максфоль «Мордовия Республикань Почётнай гражданин» лемсь. 1944 кизоня 17 кизоса цёракс сон тусь фронту. 1945 кизоня прважазь Дальняй Востоку. Япониять капитуляцияда меле военнай частьснон ётафтозь Порт-Артуру, коса Владимир Герасимович служась 1951 кизоть самс. Казьф Отечественнай войнань II степенень орденца, «За победу над Японией» медальса. Трудовой кинц оцюшканц Владимир Герасимович сотнезе машина кить мархта, коса и покодсь 1987 кизоть самс.
Мордовиянь Оцюнясь седи ваксста поздравляндазе ветеранть Великай Сяськомань шить мархта и китькстазе, што советскяй солдатть подвигоц питнидонга питни странаньконди, сон аф юкстави, и арьсесь ветеранти кеме шумбраши.
Наталья Андреевна Мартыновать шири Мордовиянь Оцюнясь якась мартста. ВОВ-нь участницати максфоль «Мордовия Республикань Почётнай гражданин» знак и «1941-1945 кизонь Великай Отечественнай войнаса Сяськомать 80 кизоц» юбилейнай медаль.
Мзярда ушедсь войнась, кемонце классонь тонафнити Наталья Мартыновати ашель 18 кизовок. Армияв сон тертьфоль шачема шистонза, 1942 кизонь ноябрьста. Стирсь ётась радисткань курст, мезьда меле служась Восточнай, сяльде—Западнай фронтонь войскатнень эса. Войнань мекольдень шитнень ванфтсь Вильнюсса военнай седть эса, а Сяськомать васьфтезь постса. Казьф Отечественнай войнань II степенень орденца. Мирнай эряфса Наталья Андреевна покодсь республикань агропредприятиятнень эса.
Республикань руководительсь поздравляндазе войнань участницать Великай Сяськомань шить мархта и арьсесь лама кизонь эряф.
«Мордовия Республикань Почётнай гражданин» лемть максоманц мархта Великай Отечественнай войнань ветеранть Григорий Степанович Корнилаевонь поздравляндамонза Артём Здунов стане жа сашендсь лична.
Мзярда ушедсь войнась, Григорий Степановиченди ульсь 15 киза. Вейхксоце классть аделамда меле цёрась мольсь военкомату и эняльдсь прважамс сонь авиационнай войскатненди—арамс лётчикокс сон арьсекшнесь ёт шабакс. Тонафнемать шумордамда меле 1944 кизоня Григорий Корнилаев участвовандась Чёрнай моряса боевой действиятнень пингста, Одессать и Николаевть воляс нолдамста тюрематнень эса. 1945 кизоня прважафоль Дальневосточнай фронту. Сяськомань Шить васьфтезе Дальняй Востокса, коса поладозе тюремать Япониянь армиять мархта. Ветеранць казьф «За Победу над Германией», «За Победу над Японией», «За боевые заслуги» медальхнень мархта и Великай Отечественнай войнань I степенень орденца. Войнада меле служась МВД-са.
«Кеме шумбраши тейть, Григорий Степанович, Великай Сяськомань шить мархта!»—мярьгсь Артём Здунов ветеранть поздравляндамста.