12 июньцта Мордовиянь Оцюнясь Артём Здунов ульсь Атяшевскяй райононь Лобаски велеса, коса поздравляндазень земляконзон Святой Тройцять и велеть 420 кизонь топодеманц мархта.
Лобаски велесь вятьсы эсь историянц 16 векста сявомок. Тяса шачсь-кассь лама содаф ломань, синь лувкссост—Советскяй Союзонь Геройсь, генералсь-майорсь Василий Здунов, эрзянь поэтсь Яков Кулдыркаев. И тячивок ломаттне, конатнень ункссна тя веленнет, аф юкснесазь родной аймакснон и койс коре сашендыхть тяза Тройцянь шиня.
Республикань Оцюнясь, самок ёмла родиназонза, васендакиге путсь панчфт Великай Отечественнай войнаса шавф воиттнень памятникснонды и лятфтазень синь минута кашт аф молезь ащезь.
Велень центральнай площадьса тя шиня ётафтовсть народнай гуляният—тяса ульсь кода кулхцондомс творческяй коллектифнень выступленияснон, ваномс народнай промыслань и декоративно-прикладной творчествань выставкать. Козя мокшэрзянь крайсь асу ломаньца! Шуфтста керсемась, сюреса сёрмадомась, гончарнай маштомошись и ламось лиясь—семботь тянь ульсь кода аф аньцек няемс эсь сельмоса, но и варжамс тонадомс ня тефненди мастер-класснень пингста.
«Кельгома землякт, сюкпря, мес тердемасть монь тя илати. Россияти кельгомась ушеткшни семьяти, ялгатненди, шачема-касома масторти кельгомаста. Сембе оцюсь ушеткшни ёмланяста, а марса минь—оцю вий!—мярьгсь Артём Здунов.—Тейне оцю честь тячи улемс марса мархтонт, родной Лобаски велень, родной Атяшевань, родной Мордовиянь ломаттнень мархта. Поздравляндатядязь тинь Россиянь Шить, Святой Тройцять мархта, арьсян сембонди мир, шумбраши и цебярь эряф!»
Илать пингста чествовандафтольхть велень труженикне. Мордовиянь Оцюнять, республикань Правительствать и районнай администрациять эзда казнет максфтольхть АПК-нь работникненди, учительхненди, медикненди, лама идень семьятненди, од специалисттненди.
Велеряйхнень стане жа поздравляндазь республикань Правительствать Председателец Владимир Сидоров и Ардатовскяй и Атяшевскяй епископсь Вениамин.
Официальнай пяльксть шумордамда меле Мордовиянь Оцюнясь корхнесь земляконзон мархта, ванозе, кода ётафтовихть вело- и мотогонщикнень показательнай выступлениясна.