Мордовиянь Оцюнясь васетькшнесь СВО-нь участникнень семьяснон мархта

Мордовиянь Оцюнясь Артём Здунов 17 августста Атяшеваса ётафтсь васедема СВО-нь участникнень семьяснон мархта. Васедемаса примасть участия Мордовиянь Правительствать Председателец Дмитрий Поздняков, вице-премьерсь Галина Лотванова, Саранскяй и Мордовскяй митрополитсь Зиновий, Атяшевскяй райононь оцюнясь Константин Николаев, Ардатовскяй и Атяшевскяй епископсь Мелетий.
«Фалу содасть, што минь ваксонттама, кирдьсаськ ширентень любой ситуацияса»,—пшкядсь республикань руководительсь боецнень радня ломаньцнонды.
Кафта воиттне—Алексей Щуков и Александр Лысяков—шавовсть СВО-ть пингста. Синь мала ломаньцна хуш и ризнайхть тя оцюдонга оцю зиянть инкса, но мужестваснон и ваймонь кемошиснон аф юмафнесазь.
«Пингсь моли, шабатне касондыхть, мяляфтыхть аляснон колга. Хуш и стака, но эряфсь моли сяда тов, эряви эрямс иденьконь инкса»,—мярьгсь Татьяна Лысякова.
«Сюкпря, Артём Алексеевич, семьяньконь лангс мялень шарфнеманкса. Минь аф юкснесамазь, лезнихть сембоса»,—азозе шавф боецть тядяц Вера Щукова.
«Куроконе ни мрдальхть шабаньке эрекста. А лядыть минь сяськсаськ»,—мярьгсь Антонина Филева.
Артём Здунов макссь поручения райононь оцюняти кирдемс башка контроль ала СВО-нь участникнень семьяснон ширеснон кирдеманц мархта сотф кизефкснень. Боецнень тядясна и рьвасна азозь, што Константин Николаев фалу кирди мархтост соткст.
Мордовиянь Оцюнясь корхнесь шабатнень мархта, кизефнезень тонафнемать, спортивнай занятиятнень колга, сянь квалма, мезсь аф сатни.
«Кда азомс видеста, тейне мезевок аф эряви. Мон учендан, мзярда алязе мрдай»,—мярьгсь 12 кизоса Арсений Исаев. Мярьгсь аф кайгиста, но сяшкава кемоста, што сонь валонза токазь васедемань эрь участникть седиенц.
Мрдайхть. Сяськома мархта. Обязательна.