Мордовиянь Правительствать видеса гуманитарнай наукань НИИ-ть директороц, Российскяй Военно-историческяй обществать Мордовскяй региональнай отделениянц председателец, историческяй наукань докторсь, профессорсь Галина Куршева: «Мемориалть панжевомац сембе пингс сувай Россиять историяс!»

—Галина Александровна, мзярда и кода Мордовияса панжеви Сурскяй оборонительнай рубежень строительхненди мемориалсь?
—Мемориалсь, конань республикань Большие Березники велеса строязе Российскяй Военно-историческяй обществась, кармай панчф тяддень 29 апрельста. Учендови, што панжемстонза Мордовия Республикань руководствада башка мархтонк тяфта жа кармайхть Российскяй Военно-историческяй обществань и странань кой-кона региоттнень руководительсна. Торжественнай мероприятияс тяфта жа пуромихть Сурскяй оборонительнай рубежень строительхнень, кит тячи эряйхть Мордовияса, представительсна, Великай Отечественнай войнань ветераттне, тылонь труженикне.
Пуромфненди няфтевихть историческяй реконструкция и патриотическяй моронь оцю концерт, конань аноклазе республикань Культурань, национальнай политикань и архивнай тевонь министерствась.
Надиян, што Мемориалть панжевомац сембе пингс сувай Россиять историяс!
—Лувихненди пара улель содамс кие арьсезе-тиезе Сурскяй оборонительнай рубежень строительхненди мемориалть проектонц?
—Тя проектть коряс работась ушедовсь 2014 кизоня. Эста Саранск ошень архитекторхне тиезь Мемориалонь васенце эскиснень. Кизода меле Россиянь Военно-историческяй обществать Мордовскяй региональнай отделениянц ся пингонь председателец, профессорсь Валерий Анатольевич Юрчёнков кеподезе тя кизефксть Обществать руководстванц инголе. И 2021 кизоня ульсь примаф решения, конань коряс Мемориалсь ушедсь строявома республикань Большие Березники велень Гагаринонь лемса паркса.
Тя проектть арьсезь-аноклазь Россиянь Заслуженнай художниксь, скульпторсь Юрий Злотя и архитекторсь Владимир Злотя. Проектть ванозь и кемокстазь Мордовиянь Оцюнясь Артём Здунов и Российскяй Военно-историческяй обществать председателец Владимир Мединский.
—Галина Александровна, нинге кодама мероприятият Великай Сяськомать 80 кизонц лемс гуманитарнай наукань НИИ-сь и Российскяй Военно-историческяй обществать Мордовскяй региональнай отделенияц арьсихть ётафтомс тядде?
—Тя пингс Великай Сяськомать лемс минь ётафтоме ни сатомшка лама мероприятия. Кепотьксонди, тяддень 16 апрельста И.Д.Воронинонь лемса Мордовскяй республиканскяй объединеннай краеведческяй музейса ётафтовсь «Великая Победа: наследие и наследники» лем ала «круглай шра». Пингстонза мон тиень «Историческая память под прицелом фальсификации истории» доклад. Пачфтине пуромфненди, кода тячи марстонь Западса меколанкт шарфневихть Великай Отечественнай войнать колга историческяй факттне.
Тя форумса тяфта жа тись «Трудовой подвиг жителей Мордовии в годы Великой Отечественной войны» лем ала доклад институтоньконь главнай научнай сотрудникоц Татьяна Гусева. Сон азозе пуромфненди, кле, Саранск ошти ладяй «Город трудовой доблести» почётнай лемсь. Сон макссеви Российскяй Федерациянь ся ошненди, конатнень эряйсна тисть няевикс путкс Великай Сяськомать сатоманцты.
Тяда башка, оцю работа институтонь сотрудникне ётафтсть ХХХII-це Малькинскяй лувоматнень эса, конат ётафтовсть Атерь велеса и лемтьфтольхть поэтть-фронтовикть Александр Степанович Малькинонь колга валда мялямти.
Тяддеть аделавомс кармайхть и лия мероприятият. Фкясь синь эздост Международнай научно-практическяй конференциянь форматса ётафтови Саранскяйса май ковста. Пингстонза Россиянь и омба масторонь учёнайхне-историкне очнай и онлайн-форматса азсазь Великай Сяськомать историческяй оцюдонга оцю питненц колга эсь мяльснон.
—Удалаза арьсефонте, Галина Александровна.
—Сюкпря!
Владимир Нестеров.