«Сембось Сяськомать инкса!» Народнай фронтть проектоц мольфтеви сяда тов. Вельденза эрти эздонк ули кода лездомс ДНР-нь и ЛНР-нь воинскяй подразделениятненди. pobeda.onf.ru сайтса тянь колга ули кода морафтомс сяда крхкаста. ЛНР-нь и ДНР-нь боецне семботь тиендьсазь Донбассть воляс нолдаманц инкса.
Тя проектть вельде ули кода лездомс солдаттненди и кафта ня республикатнень ся эряйснонды, конат повсть зиянц Украинать военнай тевонзон инкса.
Мордовиясь аф ащи ширеса «Сембось Сяськомать инкса!» проектть эзда, мезть колга аф весть пачфнеме «Мокшень правдаса».
Ня шитнень Общероссийскяй Народнай фронтть Мордовия Республикань Исполкомсонза пачфтезь, што проектса сяда тов примай участия Свято-Троицкяй Чуфаровскяй алянь монастырсь, кона Ромодановскяй районца. Сон тага макссь 40 литра медь Донбассу. Инголи монастырсь усксесь ни тняра жа медь, кона прважафоль боецненди передовои. Кода няйсаськ, Мордовиянь духовенствась няфни цебярь кепотькс сембонди.
Луганскяй и Донецкяй Народнай Республикатненди гуманитарнай лезкс Народнай фронтть региональнай Исполкомозонза аф кунара усксь Приволжскяй федеральнай округть эзга «ТФГИ» ФБУ-ть Мордовскяй филиалоц. Лезксти сувсесть ламос ванфтови ярхцамбяльхть, медицинскяй маскат, ранань сотнемань эрявксни материалхт и ламось лиясь.
Саранскяйста индивидуальнай предпринимательсь Елена Н. кочкась школав якамс колма рюкзакт тонафнеманди инь эрявиксть: карандашнень, линейкатнень, пеналхнень и ламоть лиять мархта.
Мордовия Республикать эзга Россиянь УФСИН-ть сотрудниконза анокласть ЛНР-нь и ДНР-нь эряйхненди ярхцамбяльхть: ямкст, сахар, сал, шинжаромань вай, сгущёнай лофца.
«Тя тевса саме мяльс лездомс мезьса машттама. Странаньконь народоц тяфтама пинкнень пуропнесыне виензон, лезни—тяфта сяськомати карматама молема сяда курокста»,—азозь УФСИН-ть представителенза.
Целайнек, синь пцтай эрь шиня сашендыхть Народнай фронтть региональнай Исполкомозонза и каннихть лезкс мархта пакетт.
Аф ётнихть вакска и эряфкшу ломаттне. Пенсионерхне Исполкомста анцесазь эрявикс реквизиттнень, а меле вельденза кучсихть эрявикс счётти ярмак.
Луганскяй и Донецкяй Народнай Республикатнень воинскяй подразделенияснонды и мирнай населенияти ули кода лездомс Народнай фронтть региональнай Исполкомонц вельде. Саранск ошсь, Ленинонь проспектоц, 12№ кудсь (Союснень Кудсна), 104№, 114№ кабинеттне. Телефоттне: 24-15-50, 24-08-69.
Сяда лац лезксть максоманц колга ули кода содамс pobeda.onf.ru сайтса.
Тяниень пингть тоса мольфтеви оцю работа гуманитарнай лезксонь кочкамать коряс. 30 августста Артём Бичаев кочксесь ярмак ЛНР-са БПЛА-ть мархта работамати тонафтомать коряс центратнень тиемаснонды, Полина Цветкова лезни мирнай населенияти и стак тов.
Ялгат! Нинге весть лятфтасаськ: Российскяй Федерациянь эрь субъектса работайхть Народнай фронтть региональнай отделениянза. Тоза ули кода кандомс сянь, мезсь эрявксни ЛНР-нь и ДНР-нь боецненди.
Сембось Сяськомать инкса! Сяс мес лиякс аш кода.
Т.Альшина.