7 апрельста Мордовияв сашендсь Россиянь Оборонань министерствань Центральнай конкурснай комиссиясь, кона ванозень 2024 кизоня Мордовия Республикаса военнай службас граждаттнень анокламаснон и призывть ётафтоманц результатснон. Военнай службас граждаттнень анокламаснон коряс работать итогонзон мяльс сявозь меля республиканьке занязе васенце вастть РФ-нь субъекттнень ёткса, конат ащихть Центральнай военнай округса, и сувась странань вете инь цебярь субъекттнень лувксс.
Республикань Кудса ётафтф совещаниять пингста Мордовиянь Оцюнясь шарфтсь мяль: «Минь пуромоме, штоба няфтемс Центральнай конкурснай комиссияти 2024 кизоня военнай службас граждаттнень анокламаснон и призывной кампаниять ётафтоманц коряс результаттнень. Васенцеда участвовандатама инь цебярьста анокламать коряс конкурсса Российскяй Федерациянь вете субъекттнень лувксса. Республикасонк оцю военнай службас годностень показательсь. Мекольдень несколька кизотнень высшай образования мархта граждаттнень лувкссна, конат прважафт военнай службань ётама минь республикастонк, стане жа фкя инь оцюсь. Президентть поручениянц мяльс сявозь минь виияфнесаськ од ломаттнень патриотическяй воспитанияснон коряс центратнень, работатама Юнармиять, Васенцетнень Движенияснон мархта, эреклафнесаськ «Зарница» налхкомать. Башка вастса тейнек ащи «Есть такая профессия—Родину защищать» всероссийскяй информационно-агитационнай акциясь. Тячи Мордовиянь цёратне лувондсазь честекс Россиянь Вооружённай Вийхнень эса служамать. Минь марятама инксост гордость».
Центральнай конкурснай комиссиять председателец, РФ-нь Вооружённай Вийхнень Генеральнай штабснон Главнай организационно-мобилизационнай управлениянц начальниконц заместителец Владимир Цымлянский шарфтсь мяль, што республикаса призывникнень годностьснон показателец—сяда оцю среднероссийскяйть коряс. «Меля призывонди заданиять Мордовиясь пяшкодезе цебярьста и педа-пес,—мярьгсь сон.—Практикась няфнесы, што инь цебярь результатт сатнихть ся субъекттне, коса лиятнень коряс сяда лац ладяф властень оргаттнень и общественнай организациятнень работасна, коса фалу мольфтеви военно-патриотическяй воспитаниясь. Вов тя и лездсь Мордовияти васенцеда занямс васенце вастть Центральнай военнай округти сувси региоттнень ёткса».
2020 кизоста сявомок юнармейскяй движениять лувксоц республикаса кассь кафтонь-крда—4 тёжятть ломаньда.
Мордовия Республикань военнай комиссарсь Игорь Тихомиров пачфтсь военнай службас граждаттнень анокламаснон результатонзон колга. МР-нь здравоохранениянь министрсь Олег Маркин пачфтсь граждаттнень медицинскяй освидетельствованияснон и медицинскяй обследованияснон коряс мероприятиятнень квалма. МР-нь образованиянь министрсь Елена Солдатова азондсь образовательнай организациятнень эса военнай службань основатнень коряс граждаттнень анокламаснон итогонзон и од ломаттнень военно-патриотическяй воспитанияснон колга. МР-нь спортонь министрсь Никита Ларьков выступандась од ломаттнень ёткса спортть виияфнеманц колга доклад мархта, а стане жа пачфтсь «Готов к труду и обороне» спортивнай комплексонь норматифнень пяшкотькшнемаснон колга.
Конкурснай комиссиянь члеттне стане жа ванозь Советскяй площадьса Сяськомань парадть репетициянц и путсть панчфт воиттненди-интернационалисттненди памятникти.