Мордовияса аноклайхть Сяськомань шити
Странасонк инь главнай илать — Сяськомать 80 кизонц праздновандаманцты анокламать колга корхтафоль 10 апрельста Республикань Кудса ётафтф совещанияса, конань вятезе МР-нь Правительствать Председателенц васенце заместителец Галина Лотванова.Саранскяйса и Мордовиянь райоттнень эса арьсефт илань мероприятият, конат лемтьфт тя событияти. Башка контроль ала ащи республикань сембе населённай пункттнень эса Великай Отечественнай войнань участникнень памятникснон петемаснон-тиемаснон коряс Артём Здуновонь поручениянзон пяшкодемасна. Сембе работатне эрявихть шумордамс апрель ковть аделавомс.Сяськомань шиня Саранскяйса и республикань райоттнень эса ётафтовихть торжественнай мероприятият, конат лемтьфт тя священнай датати. Ётафтомань центракс арай Мордовиять столицац. Саранскяйса 9 майста кармай марш-парад и театрализованнай представления, конат лемтьфт Великай Отечественнай войнаса Сяськомать 80 кизонцты. Тя шиня Советскяй площадьса келептеви «Сяськомань квартал» — патриотическяй проектонь эрь кизонь республиканскяй фестиваль. Илять республикань эряйхненди и инжихненди ули кода поладомс «Свеча памяти» Всероссийскяй акцияти. А илань карша Мордовиянь эряйхненди «Огарёв Арена» стадионца ётафтови театрализованнай представления.Фкя инь оцю мероприятиякс арай 29 апрельста Оцю Березник велеса «Сурский рубеж» мемориальнай комплексть панжемац. Сонь строяманц и петеманц-мазоптоманц коряс работатне шумордама лангсот, мольфтеви торжественнайста панжеманцты анокламась. Монументсь водендаф Великай Отечественнай войнать пингста республикань эряйхнень трудовой подвигснон колга мялямть сембе пингс ванфтоманцты. Проектть юрсонза — тылонь труженикнень, конат тисть оцюдонга оцю путкс Родинать араламанцты, афкуксонь судьбасна. Мемориалсь, коза сувасть художественнай горельефсь, памятниксь и информационнай панельхне, кармай лятфнема строительхнень подвигснон колга. Сон ладяф Оцю Березник велень паркса аф ичкозе оборонительнай сооружениятнень вастснон эзда.9 майти анокламать пингста оцю мяль шарфневи эряйхнень безопасностьснон обеспечендаманцты. «Ломаттнень безопасностьсна — тя минь фкя инь васенце задачаньке», — китькстазе Галина Лотванова. Сон стане жа мярьгсь, што Сяськиень Поколениянь фкявок представительсь аф кадома мялень апак шарфтт: Великай Отечественнай войнань ветераттнень инголе минь аф пандови шумосотама, и илань шитнень тиема стане, штоба синь марялезь минь заботендаманьконь».