Мордовияса корхтафоль од ломаттнень ёткса терроризмань и экстремизмань профилактикать колга

20 ноябрьста Мордовскяй республиканскяй од ломанень центраса МР-нь антитеррористическяй комиссиять вельде ётафтовсь «Информационнай безопасностьсь, од ломаттнень ёткса терроризмань и экстремизмань профилактикась» республиканскяй семинар.
Ингольдень валса участникненди пшкядсь РМ-са од ломанень тефнень коряс Государственнай комитетть Председателец Анастасия Грешнева. Сон азозе, што аш кода инголдамс экстремизмать и терроризмать, кда аф вятемс эрь шинь работа од ломаттнень мархта. Эряви, штоба шабатнень козякодольхть цифровой содамошисна и шовордамс марс сембе общественнай структуратнень вийснон.
Онлайн – форматса корхтамати шовордавсь Херсонскяй областьста од ломанень политикань министорть заместителенц тевонзон тиендисна Дарья Крупная. Сон азозе региоттнень ёткса опытонь полафнемать эрявиксшинц. И нинге корхтась сянь колга, што тяниень пингть вешфксонзон коряс эрявихть пуроптомс вийхне марс од ломаттнень патриотическяй воспитанияснон коряс.
МР-нь антитеррористическяй комиссиянь отделть заведующаенц заместителец Светлана Юдина шарфтсь мяль тяфтама гразяматнень лангс, кода диверсиянь тиемс сиводемать, SIM картань вельде мошенничествать, «дропперствать» — лия ломанень (посредниконь) вельде ярмаконь максомать и «биодроттнень» колга.
«Биодроттне» — тят ломать, конатнень «програмировандасазь» и ваныхть мельгаст психологическяй люпштамать вельде. Синь лоткайхть арьсемда и семботь тисазь станя, кода теест мярьгихть, аф шарьхкодемок, што тифсна пяк кальдяв и аф законнай. Сембось тя шарфты сянь лангс, кода ба зиянць тиеволь дронца, аньцек пульт вельде, а тяса психологическяй люпштамать вельде. А ломаттне мушендовихть интернетста и социальнай сеттнень эзда.
Тяфта жа вал максфоль антитерроронь геройти Виталий Ефремовонди – СВО-нь участникти, конац лятфтась Родинать безопасностенц и араламанц коряс инь эрявикс принципнень колга.
МР-нь МВД –нь экстремизмати каршек ащемань Центрать сотрудникоц азондозень террористическяй гразяматнень каршес тяниень пингонь тюремань метоттнень. А Нижегородскяй и Белгородскяй областьста эксперттне азондозь эсь работаснон колга опытснон.
Тя межрегиональнай семинарсь арась опытонь полафнемать коряс эрявикс площадкакс.