Мордовияса «Од ки» форумсь кармай эрь кизоннекс

Мордовияса аделавсь «Од ки» форумсь. Кочксевсть специальнай военнай операциянь ветераттне, конат юмафтозь зренияснон боевой действиятнень пингста. Ушедыкс тя илати ульсь СВО-нь ветеранць, «Герои среди СВОих» региональнай программать финалистоц Александр Миронов.
Форумс сашендсть странань 15 регионцта. Дмитрий Петров Саранскяи сашендсь Дарья рьванц мархта Великай Новгородста. Вов ни кемонь кизот синь молихть кяденьбецек эряфть эзга. Дмитрий – военнай, васенце контрактонц тиезе 11 кизода инголи. Служамань пингста кенерсь улемс лама командировкаса, тякоть лувксса – Сирияса. 2022 кизонь февральста тусь СВО-в.
Тяддень 3 февральстта стакаста ранендафоль, мезть эзда сокоргодсь.
«Мзярда реанимацияса сань ёжезон, шарьхкодень, мезе лиссь мархтон, тя ашемань абонфта. Эстокиге кармань арьсема, кода сяда тов эрямс. Лама арьсень рьвязень колга. Содайне, што сон фалу ули вакссон. Мзярда стянь пильге лангс, венемонь спортти, — азонды Дмитрий Петров.
Госпитальхнень эса пчксесь вейхкса кофт, сяльде мрдась куду.
«Мзярда гайфтсть тейне Димань родителенза и азондозь, мезе лиссь, эстокиге шарьхкодине – эряви фалу улемс вакссонза, — азонды рьвац Дарья Петрова.
Колма шиста форумонь участникне кулхцондсть лекцият, васьфнесть социальнай учреждениянь представительхнень мархта, якасть мастер – класс.
«Тя эрявикс опыт, кода ветераттненди, станя и тееньк, кураторхненди.Тядде минь ушедоськ «Од ки» форумть, и сон кармай ётафневома эрь кизоня. Оцю сюкпря тянкса МР-нь Главати Артём Здуновонди, «Единая Россия» партияти, бизнес сообществати. Минь получаме форумть колга цебярь валхт героеньконь эзда, синьге мялезост тусь, — мярьгсь МР-нь Оцюнять старшай советникоц Татьяна Алиходжина.
«Нюрьхкяня пингста аноклафоль форумсь, сонь программац, конац ульсь интереснай эрь ломантти. Цёратне – видексонь боецт. Синь аф няйсазь шивалдть, но синь ашезь нолда кядьснон. Башка ёрасайне шнамс рьвятнень, тядятнень, сазорхнень, конат арасть теест нежедема вастокс, — мярьгсь Ольга Сергушина.
Форумть аделамста Александр Миронов азозень ветераттнень мархта арьсеф тефнень.
«Примаф решения тиемс аф няи и кальдявста няи боевой действиянь ветераттненди территориальнай предстовительстват. Васенцесь ули панчф Мордовияса, а сяльде – лиясовок. Республикаса кармай улема социально-реабилитационнай квартира, конань видеса карматама лездома ветераноньконди мрдамс мирнай эряфти, — мярьгсь Александр Миронов.
Тяда башка «Поколение чести» образовательнай программаса няфтеви аф няи ветеранонь союзть командац. Корхтафоль ветераттнень и аф няиенди сельмованомань арьсихнень-тиихнень мархта сотксонь тиемать колга.
Ветераттне азозь эсь мяльснон форумть колга, а сяльде азсть оцю сюкпря Аллександр Мироновонди и форумонь лия аноклаенди — ётафтыхненди.