5 ноябрьста сявомок Мордовиянь Оцюнясь Артём Здунов и региононь представительхне работасть Китайскяй Народнай Республикаса, коса примасть участия «Волга-Янцзы» форматса межрегиональнай сотрудничендамать коряс Советть заседанияса. Мордовия Республикать эзда официальнай делегацияти сувсесть региональнай правительствань зампреттне Наталья Таркаева, Батыр Эмеев, Н.П.Огарёвонь лемса МГУ-нь ректорсь Дмитрий Глушко.
Васенце шиня Артём Здунов васетькшнесь Китайскяй Народнай Республикаса Российскяй Федерациянь Чрезвычайнай и Полномочнай Посолть Игорь Моргуловонь мархта. Корхтамась мольфтевсь республикать и Китаень провинциятнень и ошнень ёткса сотрудничендамать потенциалонц колга. Азфоль, што Россиянь Президентть мархта путф задача—касфтомс странаньконь ёткса товарооборотть, и Мордовиясь тиендьсы марстонь результатть сатоманкса эсь путксонц.
КНР-сь—Мордовиять основной деловой партнёронзон ёткста фкясь. Республикать внешнеторговай оборотонц пцтай ветецекс пяльксонц тиендьсы Китайть мархта мишендемась. Тядде мишендемань объёмтне кассть пцтай 40 процентта ётай кизонь тяка пингть коряс. Экспортсь касфтовсь пцтай нилень-крда. Китайть мархта партнёронь кеме соткст кирдихть республикань ведущай промышленнай предприятиятне—«Биохимик» фармацевтическяй флагманць, кабельнай, оптиковолоконнай, светотехническяй продукциянь производительхне.
Мордовиясь путни эсь инголенза цель келепнемс КНР-ть мархта сотрудничендамать аф аньцек торгово-экономическяй ширеса, марстонь инвестиционнай платтнень эряфс ётафтомаса, но и гуманитарнай сфераса. Образованияса лац виияфневихть Мордовскяй государственнай университетть китайскяй коллеганзон мархта марстонь проектсна. Саранскяйса вузть видеса тядде панчф Российско-китайскяй ялгаксшинь обществать региональнай отделенияц, келепневи Китаень оцю научнай центратнень мархта сотрудничендамась.
7 ноябрьста Мордовиянь делегациясь ётафтсь васедема Чжэньцзянь ошень Горкомть секретаренц Ма Минлунонь мархта.
Артём Здунов шарфтсь мяль, што делегациять визитоц ётафтови Россиянь и КНР-нь оцюнятнень аф кунардонь васедемасост примаф решениятнень мяльса кирдезь. Синь сотфт странаньконь ёткса сембе ширетнень коряс сотрудничендамать келепнеманц мархта. «Минь карматама шарфнема мяль экономикать, спортть и образованиять лангс»,—мярьгсь васедемать пингста Мордовиянь Оцюнясь.
Республикань руководительсь стане жа китькстазе, што марстонь тефт активнайста мольфтевихть ни Н.П.Огарёвонь лемса МГУ-ть и Наукань и технологиянь Цзянсускяй университетть ёткса.
Васедемать пингста корхтафоль сотрудничендамать сяда товолдонь мольфтеманц колга, а стане жа шарфтфоль мяль Саранскяйть и Чжэньцзянть ёткса побратимскяй сотксонь ладямати.
Тяка шиня Мордовиянь делегациясь ульсь Чжэньцзян ошса Наукань и технологиянь Цзянсускяй университетса. Республикань представительхне васетькшнесть вузть ректоронц Цзи Чуньянонь мархта, преподавательхне и студенттне ётафтсть инжихненди экскурсия, стане жа корхтафтфтольхть сяда товолдонь марстонь тевонь вятемать коряс платтне.
Университетонь преподавательхнень и студенттнень мархта васедемаса Мордовиянь Оцюнясь Артём Здунов азондсь платтнень колга—2025 кизоня Н.П.Огарёвонь лемса МГУ-сь марса Цзянсускяй университетть мархта ётафтсы Российско-Китайскяй международнай институту васенце студенттнень кочкамаснон. Республикань руководительсь азозе, што тяса кармайхть теплоэнергетикать, од материалхнень, оптоэлектроникать, культурать и кяльхнень тонафнемаснон коряс од программат.
Лятфтасаськ, Н.П.Огарёвонь лемса МГУ-са 2019 кизоста сявомок работай Китайскяй кялень и культурань центра.
8 ноябрьста ётафтовсь «Волга-Янцзы» форматса межрегиональнай сотрудничендамать коряс Советть заседанияц, коса примась участия Приволжскяй федеральнай округса Россиянь Президентть полномочнай представителец Игорь Комаров.