Мошенникне аф удыхть! Тяда пова килькшезост!

Ня шитнень Саранскяйса Мордовия Республикань Пресс-центраса ётафтовсь пресс-конференция, конань пингста корхтафоль мошенникнень, синь кальдяв тевснон колга и каршезост тюремать квалма.
Мордовия Республикать эзга Внутренняй тевонь министерствань уголовнай розысконь Управлениять отделонц начальникоц Андрей Глинскяень валонзон коряс, мекольдень кофнень кассь мошенникнень мархта тиф кальдяв тефнень лувкссна. Синь стаки нолясазь тевс финансовай атакатнень, телефонть вельде мошенничествать и махинациятнень. Эздост сашендыхть сообщеният и гайфтемат, конатнень вельде сотцеви ломаттнень колга личнай информациясь. Тяфтама даннайхнень кочкамаснон инкса мошенникне сидеста нолясазь тевс интернетса объявлениятнень и сайттнень. Кой-коста ломаттне синць анокт азомс или максомс эсь колгаст ня даннайхнень, сяс мес арьсихть, бта тяда меле получайхть кодамовок пандома или мезевок сатыхть акцияса или теест максови ярмак опрость ётамдонза меле. Башка мяль шарфнема онлайн-маркеттненди и приложениятненди, конатненди сувафтомат банковскяй и личнай даннайхне.
Мордовия Республикать эзга Россиянь УФСБ-ть пресс-службанц сотрудникоц Екатерина Кондратьева шарфтсь мяль сянди, што мошенникне сидеста азонкшнесазь пряснон силовой структурань, Безопасностень федеральнай службань сотрудникокс. Мяляфтость и азость мала ломанентенди: ня службань афкуксонь сотрудникне мзярдовок аф анцихть ломаттнень кядьста ярмакт, аф эвфнихть телефонца гайфнемста, аф гайфнихть и аф тяшнихть мессенджерхнень вельде и аф кучсихть кодамовок документт и служебнай удостовереният. Кда теенть кивок гайфтсь вяре азфть коряс, путость трубкать и гайфтеда тинць 28-28-28 телефононь номерть коряс ФСБ-ть дежурнай частезонза.
Татьяна Альшина.