КАЛУГАНЬ ЭРЯЙСЬ ВАСЬКАФТОЗЬ САЛАЗЕНЬ САРАНСК ОШЕНЬ ЭРЯЙТЬ
ЯРМАКОНЗОН
Кода пачфневи «Стопмошенник13» телеграм-каналса, Калугань эряйсь васькафтозь салазень Саранск ошень эряйть ярмаконзон, мзярда ся ёрась рамамс колма хайлайтерхт интернет-лавкать вельде.
Россиянь УМВД-ть Саранск ошень округть эзга 3№ полициянь отделсь шумордазе Калужскяй областень эряйть лангс уголовнай расследованиять. Алясь муворгофневи РФ-нь УК-ть «Мошенничество» 159 статьянц 2 пунктонц мяльса кирдезь.
Тяда ингольде ётафтф расследованиять пингста содафоль, што 2020 кизонь ноябрьста муворгофневись тиезе косметикань содаф интернет-лавкать сайтонц-двойниконц и «нолдазе» интернету, коста сонь ульсь кода няемс и мумс эрти. Тияк кадозе банковскяй ся картать расчётнай счётонц, конань нолязе тевс сонць, а панчфоль картась теенза аф содаф ломанень лемс.
2021 кизонь 25 ноябрьста косметикань мишендемань интернет-лавкаса (самай сонь тиезе муворгофневись) Саранск ошень эряйсь заказась колма хайлайтерхт, конатнень питнесна 8025 цалковай. Товарть инкса ярмакнень алясь ётафтозень сайтса азф счётти инголенди пандома лаца. Но сон азф пингть ашезе получа заказонц, сяс декабрьста пшкядсь полицияв, коса и содазе, што сайтсь, конань вельде ёрась рамамс товар, фиктивнай.
Уголовнай розысконь сотрудникне ётафтсть оперативно-вешендемань эрявикс мероприятият и содазь, кие васькафтозе Саранск ошень эряйть. 2023 кизоня октябрьста алять оперативникне кирдезь Калугаса машина кинь вокзалса и пачфтезь Мордовияв. Муворгофневись виденцясь и мрдафтозень Саранск ошень эряйти салаф ярмакнень.
Уголовнай тевсь прважаф суду.
Тяда рамсе мезевок аф содаф интернет-лавкатнень эзда и тясть тиенде тянь инголенди пандомать вельде.