Мошенникне коль васькафнесазь ломаттнень

Кода пачфни «Стопмошенник13» телеграм-каналсь, апрельста Мордовиянь внутренняй тевонь оргаттненди ярмакнень саламаснон коряс сотф заявления мархта пшкядсь республикань 80-да лама эряй, конат юмафтсть 22 миллионда лама цалковай.
Преступлениянь тиемань инь сидеста васьфневи способкс арасть сим-картать действиянь пингонц и связень услугатнень договорснон кувалгофтомасна, аф содафнень мархта кредитть сявоманц и тяфта лемневи резервнай счётти кочкаф ярмакнень ётафтомаснон мархта сотф спосопне. Тяфта 30 ломанць юмафтсь пцтай 11 миллион цалковай.
Нинге 23 ломанць ётафтсть мошенникненди 8 миллиотт работань вешемать-мумать и ярмакнень инвестированияснон сюнеда.
Пцтай 2 миллиотт цалковай 20 ломанць юмафтсь питнефтома объявлениянь сайтса товархнень мимста и рамаста, социальнай сетьтнень эса содаф маркетплейснень платформаснон лангса.
Мордовия Республикать эзга МВД-сь лятфни: кда теенть гайфтихть ломатть и азсазь пряснон банконь или полициянь сотрудникокс—гайфтеда тинць финансовай организациятнень и правоохранительнай оргаттнень официальнай номерснон коряс.
Тяда ётафне инголенди пандома лаца ярмакт товархнень инкса, а нинге киндивок тясть азонда банковскяй картатнень сембе реквизитснон, PIN-кодть, CVC/CVV-коттнень и тевс весть ноляви парольхнень операциятнень кемокстаманкса. Теенть ярмакнень ётафтомаснон инкса сатомшка аньцек банковскяй картать номероц.