Мошенникне кошардозь 13 кизоса шабать ётафтомс тядянц счётстонза пцтай 300 тёжянь цалковай

Тянь колга пачфни «Стопмошенник13» телеграм-каналсь.
Саранск ошень округонь 1№ полициянь отделу пшкядсь 54 кизоса ава, кона пачфтезе, што аф содафне саласть сонь банковскяй счётстонза 291 тёжянь цалковай.
Содавсь, што аф совершеннолетняй цёранц мобильнай телефонозонза гайфтсь аф содаф ломань, кона азозе эсь прянц финансовай учреждениянь сотрудникокс. Сон кошардозе цёрокшть ваномс квартирать и азомс, улихть-аш кудса наличнай ярмакт. Сяда меле, мзярда аф совершеннолетняйсь пачфтсь муф 100 долларть колга, гайфтись гразясь тядянзон-алянзон каршес уголовнай тевть панжеманц мархта. Штоба тя афоль уле, гайфтись мярьгсь цёраняти веть салава сявомс тядянц телефононц и азомс теенза коттнень, конат сайхть смс-сообщениятнень эса. Тиемок семботь, цёранясь путозе тядянц телефононц вастозонза и мезевок ашезь аза тядянзонды-алянзонды.
Саранск ошень эряйть банковскяй счётстонза юмасть кочкаф сембе ярмаконза. Мошенникнень и синь тевснон колга авась кулендсь. Но ашезь арьсе, што тя лиси мархтонза.
Мордовия Республикать эзга МВД-сь мярьгонди тядятненди-алятненди азонкшнемс шабаснонды ульцяса и телефонть вельде аф содафнень мархта корхнемать пельксонц колга, а нинге пачфнемс теест, кода вятемс прясна аф содаф ломаттнень мархта интернетса.
Тиема стане, штоба шабась шарьхкоделезе: эсь даннайхне киндивок аф макссемат, аф ётнема аф содаф ссылкатнень коряс, аф пачфнемат смс-сообщениятнень эса сашенды коттне.
Нинге идть телефонц ули кода ладямс родительскяй контролень программа, шоба шарьхкодемс, коса шабась тяни, месенди интернетса. Тядять-алять телефонозост можна путомс котт и блокировкат, штоба идсь афолезе нолда тевс устройствать.