МОШЕННИКНЕ СТАКИ ФАТНЕСАЗЬ АККАУНТТНЕНЬ

«Стопмошенник13» телеграм-каналсь пачфни, што тячиень шити мошенникне стаки фатнесазь Telegram-каналть аккаунтонзон. Кода тя уленди?
Аферисттне кучсихть ломаттненди сообщеният ся аккаунттнень эзда, конатнень «лемсна» «Администрация Telegram», «Служба безопасности», «Обновления», «Безопасность» и стак тов. Эсост тяштихть «пользовательхнень даннайснон араламанксост безопасностень системать масштабнай одстоптоманц колга». Тяфтама операциять тиеманкса мошенникне эняльдихть ётамс фишинговай ссылкатнень коряс.
Кда ломанць ётни эзганза, теенза мярьгондихть семботь тиемс инструкциять коряс. Пяшкодемок сембе пункттнень, пользовательсь сембе пингс юмафтсы доступть аккаунтти или Telegram-каналти.
Тяфтама ссылкатне пяк шарфтыхть Telegram-ть официальнай сайтонц лангс, но аф ламода явихть букватнень и символхнень тяштемаснон мархта.
Сидеста васьфневихть фишингонь кунардонь схематне. Пользовательхненди сашендыхть «конкурсса участиянь примамать», «идень конкурснень эса вайгялень максомать» колга и лия сообщеният. Кда ётамс тяфтама ссылкать коряс и сувафтомс эсь даннайхнень, эста мошенникне фатясазь аккаунтть.
Кода аф юмафтомс Телеграмса аккаунтть?
Ули несколька правила, конат лездыхть аф повомс мошенникнень килькшс:
*тяда ётне сообщениятнень эзда ссылкатнень коряс;
*тяда тиенде мезевок сянь эзда, мезти тернихть мошенниконь сайттнень эса;
*тясть макссе личнай даннайхнень и коттнень, конатнень анцесазь мошенникне;
*«нарнесть» фишинговай сообщениятнень и тиеда блокировка ся пользовательхненди, конатнень эзда синь сашендыхть.
Telegram-са аккаунтть араламанкса мярьгондеви ладямс мессенджерть настройканзон эса кафта факторста ащи аутентификация. Тя пароль, конань апак содак, кивок, пользовательда башка, аф сувай сонь аккаунтозонза лия устройстваста.
Пачфтесть тя информациять раднянтенди, тинць сявость сонь мяльс и тяда веронда мошенникненди!
Редакциять эзда.
Ёфси аф кунара мошенникне фатязь фкя авать аккаунтонц и ушедсть лемстонза сембонди тяшнема и ярмаконь анцема. Тиендезь тянь пяк верондафтыста, туфталонди азонкшнезь тевть, конань мархта авась заняфоль афкукс. Павазонди, кивок ашезь ётафта аферисттненди ярмакт, сяс мес сообщениятнень эса ламоль эльбятькста, тяконь лувксса и грамматикать мархта сотфта.
Аккаунтть афкуксонь «азоравац», кода маштсь, пачфнесь сембонди мошенникнень равжа тевснон квалма и эняльдсь аф верондамс теест. Оцю лезкс макссть ялганза и содафонза: синьге тяшнесть сембонди, што мошенникне фатязь содафснон аккаунтснон.
Тиньге, лувиеньке, хуш кинди ярмаконь кучемда инголе, несколькаксть лац-ряц содасть семботь, кизефтесть, гайфтеда. Сявость тянь мяльс и пачфтеда тянь квалма содафонтенди и мала ломанентенди.