Мошенникне васькафнесазь выпускникнень

Тянь колга пачфни «Стопмошенник13» телеграм-каналсь.
Од сообщения: пантт экзаменца шпаргалкатнень-меснень тевс нолямаснон инкса штраф.
Выпускной экзаметтнень максомасна фалу арси таколфты тевкс кода школаса тонафнихненди, стане и синь тядяснонды-аляснонды. И мошенникне, конешна, тянь колга содайхть и аф ащихть ширеса. Синь мушендсазь выпускникнень даннайснон салаф базастост. А нинге сообществатнень и телеграм-каналхнень эса, конатнень эса пачфневи выпускной экзаметтнень или вусненди поступамать колга. И вов мезе тянь эзда лисенди:
1.Мошенниксь тяшни выпускникти мессенджеру или социальнай сетьти, азондомок прянц экзаменационнай комиссиянь наблюдателькс.
2.Меле сон пачфни ученикти, што камератнень эса няеви, кода тона тестированиять пингста варжакснесь шпаргалкатненди-месненди, рузкс азомс—списывал. Сяс тянкса пандома штраф.
3.Школьниксь получай ссылка пандоманди, но, конешна, фишинговай. Кда ётамс тя ссылкава и сувафтомс эсь и тядятнень-алятнень картаснон даннайснон, ули кода юмафтомс сембе ярмакнень.
Пандома-аф штраф афкукс?
Государственнай экзаметтнень максомань правиласнон коламасна афкукс гразяй 3000 цалковайста сявомок 5000 цалковайти молемс штрафса. Но кда выпускникть кундазь, мзярда сон тевс нолязень шпаргалкатнень или лия источникнень, экзаменационнай комиссиясь тии протокол и макссы тевть суду. Сяс штрафсь латцеви аньцек судть решениянц коряс. Школаса тонафнить или сонь тядянзон-алянзон кядьста мзярдовок аф вешеви панфтомс штраф мессенджерса ссылкать коряс.