Москуста—Шокша вели эряма

Теньгушевскяй райононь Шокша велеть колга газетасонк пачфнеме ни аф весть. Мекольдень кизотнень квалманза моли цебярь слава марнек республикать келес: Шокша вели ётнихть эряма ломатть лия региоттнень эзда. И аф велеста или районнай центраста, кепотьксонди, а Казаньцта и Москуста.

Москуса шачфсь Анастасия Анатольевна Михайлова кафта иднянзон—стиренц Дашать и цёранц Костянь—мархта ётась Шокша вели ёфси аф кунара—мелянь тунданя. А кудонц рамазе 2019 кизоня.
Анастасия школать шумордамдонза меле тонафнесь педагогическяй колледжса. Сяльде лиссь рьвакс, шачсь стирнясна. Аф ваномок шабать улеманц лангс, од тядясь ламос ашезь аще тевфтома, а лиссь работама. Сонь валонзон коряс, трудовой стажец ушедсь кемготува кизоса. Пингонь ётазь шачсь цёранясна Костя. Ужяль, но Анастасия Анатольевнань семьянь эряфоц ашезь ладяв, мирденц мархта явсь.
А.А.Михайловать тядяц, Светлана Олеговна Авилова, фалу ёрась эрямс велеса. Кода корхнихть, пере мархта кудса. Сонь прязонза васенцекс и сась вели эряма тумать колга мяльс. Светлана Олеговна сась Теньгушевскяй райононь Широмасово вели. Сидеста азонкшнесь стиренцты Мордовиять колга, тернезе сонь мокшэрзянь мастору, кона пяк тусь мялезонза. Рамат, кле, тяса куд—кармай улема эсь эряма вастце. Анастасия Анатольевна арьсесь-тись и сась тяфтама мяльс. Шокша велеса теенза няфтсть несколька куд. Ся пингть од тядясь получазе материнскяй капиталть омбоце иденц инкса. Вов ня ярмакнень лангс и рамась эряма васта Мордовияса—Шокша велень Нижняй ульцяса. И ётась республиказонк эряма шабанзон мархта. Виде, савсь кой-мезе тиемс, петемс.
Мезьса тяни заняф Анастасия Анатольевна? А вов тянь колга азонттама сяда келиста.
Эсь прянц сон тяни лемнесы «колхозницакс». Самостоятельнай ёмла «колхозницакс», кона Москуста ётась эряма Шокша вели. А.А.Михайлова ушедсь перень сёронь, иможень-мезень касфнема. Участкасонза касыхть марлюфт, облепиха, инезикст, лакштормарькст, равжа шукшторукс, помидорат, куярхт, редис, модамарь, снав и лия перень сёрот.
Тянь вельде тряй пря семьяц, а нинге Анастасия Анатольевна заняф мишендемань тевса.
А.А.Михайлова получась социальнай контракт—безвозмезднай целевой субсидия. Ломаттнень ширень кирдемаснон тя од формасна эвондась 2021 кизоня. Тя контрактть мяльса кирдезь, ломанти макссеви 250000 цалковайти молемс субсидия, и кда сон карьхцясыне синь образовательнай курснень инкса пандоманди, работань вешеманди, оборудованиянь рамамс, эста мрдафтомс субсидиять аф сави.Ссоциальнай контрактть вельде А.А.Михайлова рамась сушилка, блендер, эендафтомань ларь, кядьгонь шташендома, переса и садса эрявикс паршихть, кядьгот…
Бизнес-планцонза азозе, што мялец тиендемс касыксненди переработка, сяс эряви оборудования. Кода няйсаськ, ламоть касфнесы сонць, но, кда эрявксты, переработка анок тиемс и заказс коре. Кепотьксонди, кандсы ломанць снавонц, а Анастасия Анатольевна косьфтасы сонь и тисы почфокс. Или чеснокть эзда аноклай ламос ванфтови танцти приправа.
«Тиендян переработка капстатненди, куярхненди, помидоратненди, марьхненди, фруктатненди. Аноклакшнян специят и приправат, косьфнян лекарственнай и чаень тишет»,—мярьгсь Анастасия Анатольевна.
Тяддень тунданя А.А.Михайлова мишендсь капстань рассада, конань касфтозе сонць. Пересонза касы пцтай 150 капстапря. А нинге 20 сотка лангса касфты модамарь, лия перень сёрот. Шурьхкянь урожайсь урядаф ни.
Мзярда кизефтине, мзяра мода собственностьсонза, азоравась отвечась, кле, 73 сотка «усадьбазе» и 20 сотка перезе. Тядде сокаф-путф 20 лама сотка.
Анастасия Анатольевна переса работама тонафтсыне и идензонга. Даша и Костя оцю мяльса лезнихть тядяснонды кочкомань, валомань, перень сёронь и иможень касфтомань тевса. Даша тядде моли 1 классу, Костя якай идень саду. И школась, и идень садсь Шокша велесот.
Ули Михайлофнень сявасновок.
А.А.Михайловать тядяц, С.О.Авилова, тяни эряй Шокша велеса стиренц мархта. Работай почтаса.
Анастасия Анатольевна шобдаваста шоподемс заняф кудонь и перень тефнень мархта, конат теенза пяк кельговихть.
Т.Альшина.

Последние новости

Нацпроект и снижение смертности при ДТП

В рамках национального проект «Безопасные качественные дороги» в Мордовии...

В Мордовии продолжается реконструкция районных домов культуры

Торбеевский дом культуры – центр притяжения всего района. Здание...

Дискуссия по развитию БРИКС прошла на Всемирном фестивале молодёжи

В рамках Всемирного фестиваля молодёжи в субботу, 2 марта,...

Саранск встретил март «Весенней ярмаркой подарков» 

1 марта в столице региона, при поддержке Министерства экономики,...

В Региональный сосудистый центр №2 поступает новое современное оборудование

Региональный проект «Борьба с сердечно-сосудистыми заболеваниями» национального проекта «Здравоохранение»...

ПОСЛАНИЕ ПРЕЗИДЕНТА

Инициативы Президента Владимира Путина по итогам послания Федеральному Собранию  29...

Благоустройство Дубенского района Мордовии

Центральная площадь вс. Дубенки, 2 общественные территории в с....

Нацпроект и снижение смертности при ДТП

В рамках национального проект «Безопасные качественные дороги» в Мордовии реализуется региональный проект «Безопасность дорожного движения». Одна из его задач – сокращение смертности в результате...

В Мордовии продолжается реконструкция районных домов культуры

Торбеевский дом культуры – центр притяжения всего района. Здание построено в 1974 году и давно требовало ремонта. В 2023 году по национальному проекту «Культура»...

Дискуссия по развитию БРИКС прошла на Всемирном фестивале молодёжи

В рамках Всемирного фестиваля молодёжи в субботу, 2 марта, прошла дискуссия «БРИКС: новые вызовы в эпоху глобального развития». На мероприятии также прошли дебаты «Приоритеты и...