МР-нь Оцюнясь ванозе «Аллея Российской Славы» выставкать

Мордовияса «Аллея Российской Славы» всероссийскяй патриотическяй проектть рамкаса панжевсь «Защитники Отечества на протяжении веков» выставка. Сон тись ушеткс 2008 кизоня Краснодарскяй краень Кропоткин ошса.
Проектть автороц—Михаил Сердюков, кона пуроптозень марс российскяй инь цебярь скульпторхнень, тяконь лувксса Ельниковскяй районца шачфть-касфть, Россиянь Заслуженнай художникть Иван Черапкинонь. Проектть рамкаса тиф-ладяф 2 тёжяньда лама бюст, памятник и лятфнемань знак.
«Экспозициясь, конань Отечествань аралаень кизоня минь ускоськ Мордовияв—эсь лацонне. Тя 350-да лама ломанень, конат тиезь содафокс Россиять, бюст—Владимир князть эзда сявомок тяниень пингонь геройхненди—СВО-нь участникненди молемс»,—мярьгсь проектть автороц Михаил Сердюков.
Выставкась кармай работама И.Д.Воронинонь лемса краеведческяй музейса 14 июнти молемс.
2 июньцта экспозициять ванозь Мордовиянь Оцюнясь Артём Здунов и Советскяй Союзонь Геройть В.Ф.Маргеловонь лемса 25№ лицеень тонафнихне. Экскурсиять ётафтозе Михаил Сердюков.
Мордовиянь Оцюнясь азсь благодарностень валхт проектть арьсиенцты. «Странань региоттнень и омба масторонь странатнень эса мяляфтсазь геройхнень—сембонь, кие тись путкс Великай Сяськомати. Мархтост ряцок минь лятфнесаськ сятнень, кие маласькофнесы сяськомать тяни,—мярьгсь Артём Здунов.—Тя выставкась—минь историяньке, минь основаньке. Тяза эряви самс кода семьянь келеса, стане и школаса тонафнихненди».