Отечествань Героень шиня, 9 декабрьста, Мордовиянь Оцюнясь Артём Здунов васетькшнесь солдаттнень и офицерхнень, конат шавовсть воинонь долгснон максомста, удаваснон и тядяснон мархта. Тяфтама васедемат республикань руководительсь ётафни фалу.
«Отечествань Героень шись—тинь мирдентень, цёрантень шисна. Синь вятезь пряснон, кода афкуксонь геройхть, ашесть кяшенде лиятнень фталу, а стака пингста лиссть Родинать аралама, максомок тянкса инь питнить—эсь эряфснон. Тя аф пяшкодеви юмафкс… Но эрти эздонтт эряви эрямс сяда тов, касфтомс шабантень»,—мярьгсь Артём Здунов.
Саранскяй и Мордовскяй митрополитть Зиновиень лемста протоиерейсь Алексей мярьгсь: «Мала ломаттнень юмафтомасна—тя стака крёз. Но кда Шкабавазсь максси тяфтама крёз, сон максси вийхтьке кирдемс тянь. Мордовиянь сембе храпнень эса эрь шиня мольфтевихть службат тюремань паксятнень лангса шавфнень лятфнеманкса».
Отечествань шавф аралайхнень семьяснон ширеснон кирдеманц коряс ветеранскяй организациятнень работаснон колга азондсь «Боевое братство» Всероссийскяй организациять республиканскяй отделениянц руководителец Ринат Альмяшев.
Пуромфнень, Родинань аралайхнень радня ломаньцнон ёткста ламошкась макссть оцю оценка ширень кирдемати, кона макссеви республикать мархта—тяконь лувксса «Защитники Отечества» Фондть, Отечествань воиттнень семьяснон комитетснон вельде.
Васедемась лиссь лямбоста. Азфтольхть прябалатне, конат пичефтьсазь шавф геройхнень радня ломаньцнон. Кепотьксонди, велень и районнай центрань эряйхне аф фалу содайхть ся возможносттнень колга, конат макссевихть регионца СВО-нь участникнень семьяснонды. Артём Здунов макссь поручения правительствань члеттненди, конат ответственнайхть тя работать инкса, решандамс тя кизефксть, штоба Родинань аралаень фкявок семья афоль ляда мялень шарфтомафтома и заботафтома.