МР-ть ЭЗГА МЧС-сь ПАЧФНИ

«Тядде шадотне ушедсть ковда сяда инголе учсеф пингть коряс. Тянкса миньцонк анок сембось: ётафтфт тренировкат, ломаттне аноклафт, экстреннай ситуациятнень пингста планць тиф-ладяф, венчненди тиф ремонт»,—азозе МР-ть эзга Россиянь МЧС-нь Главнай управлениять начальникоц Сергей Репин.
1 апрельста Мордовияса ведь алу тусть алга вастонь 11 седь и велень хозяйствань значениянь 4 сетть. Тяфтама палас повсть Рузонь Масканя, Киселёвка, Од Карьга, Оцю Поляна велень 86 кудсь. Велеряйхненди МЧС-нь сотрудникне анокласть венчень переправа и араламань пост. Социально значимай объекттне ваяфтомань зонатненди аф повихть, ломаттнень лия вастс ётафтомасна аф эрявксты.
Атюрьевскяй районца ведь алу «тусь» Явас ляйть туркс седсь (Кяшал велесь). Зубово-Полянскяй районца сёлкфт Вад ляйть туркс кафта сеттне—Вадовскяй Селищать и Жукуть маласа.
Мокша ляйть туркс (Ковылкинскяй районць) колма сеттне «тусть» ведь ала—Краснай Пресняса, Рыбкина велеть маласа и Васильевкаса. Стане жа сёлкф Сеитьма ляйть туркс седсь (Казённай Майдан—Сире Драка велетнень ёткса).
Ниле сетть сёлкфт Краснослободскяй районца. Нят: Рузонь Масканя, Тенишева велетнень эса Мокша ляйть туркс, Од Карьга—Песочнай Лосевка велетнень ёткса Сивинь ляйть туркс, Сире Рябка—Самозлейка велетнень ёткса Самозлейка ляйть туркс.