Н.М.Филатов: «Вийхть тейне максси шачема масторсь»

Улема, сявок, кие вестенге ашель Саранскяйса, содасыне ошсонк ащи ламоц памятникнень, тяфтапнень, кода содаф поэтть А.С.Пушкинонь, Степан Эрьзянь, святой праведнай воинть Фёдор Ушаковонь, Патриархть Никононь скульптураснон, а стане жа семьяти лемтьф памятникть. Синь тиисна РФ-нь Заслуженнай и МР-нь Народнай художниксь Николай Филатов. Тяддень август ковть песта сонь ульсь юбилеец—содаф скульпторти топодсь 70 киза. Ня шитнень мархтонза васетькшнесь минь корреспондентоньке. Седикс-ваймокс корхнемста Николай Михайлович азондсь творческяй кинц колга.

—Николай Михайлович, эрь лятфтатама аф лама идькс пингцень квалма. Кода эвондась эсот скульптурань тиемати венемомась?
—Шачень мон Дубёнскяй райононь Поводимово велеса 1952 кизоня. Семьясонк вете идьтольхть: колма цёрат и кафта стирьхть. Алязе, Михаил Васильевич, покодсь вирень десятникокс. Сон керсесь шуфтста эрь кодама паршихть, а нинге марсесь пянакутт. Вельденза мон содафтонь сёвонть мархта. Тядязе, Анастасия Ивановна, ши-шишка шарсь кудъётконь тевса. Но велень простой тя авась ваймоса ульсь афкуксонь художникокс. Шабакс пяк кельгозе рисовандаманц, аньцек аляц тянкса сюцекшнезе. Велень авати тя, кле, ёфсикс аш мезенди. Но седиец сембе сяка ашезь аерда искусствать эзда. Тядязе фалу тиендсь шапаксста эрь кодама фигуранят—нармоннят, жуватанят. Лисендсть пяк мазыста. Лангозонза ванозь монга тонаткшнень тя кядьтевти. Тядязе сидеста мярьгондсь: минь юроньке Баева велеста, а тя—мирса-масторса содаф скульпторть Степан Эрьзянь шачема аймакоц. Кода-бди весть, аф мяляфтса мзяроль кизодон, школань библиотекаса кядезон повсь Эрьзянь работанзон мархта книгась. Сон сяшкава токазе седиезень! Эста и шарьхкодине—касан, монга аран афкуксонь скульпторкс. Мяляфтса, книгать ваномда меле молень куду, мунь кевня, сявонь эске и ушедонь тиема эсь васенце скульптуразень. Тяряфнень тиемс авань ронга. А пингонь ётазь тядязе кандсь клубста алебастр. Соньге нолдайне тевс. Тиендень фигуранят-месть, и шабратне-раднятне шназь синь, кле, пяк цебярьхть, бта лавкаста рамафт. Вов тяфта скульпторонь кизе и ушедовсь.
—А тоса молеть тонафнема К.А.Савицкяень лемса Пензань художественай училищав.
—Виде, но примафолень аф эстокиге. Вступительнай экзаметтнень пингста эрявсь тяштемс сочинения и рисовандамс картина, а мезе мон, велень цёрась—художественнай образованиязе кодамовок эста ашель. Ашень поступав. Но куду мрдамс ашень эряскода. Кармань якама курсс. Синь мольфтевсть тязк, училищаса. Весть тейнек, занятияс сашендыхненди, азозь, што кинь мялец, ули кода якамс скульптурань классу. Мон васенцекс азонь пря. Арьсень тернесамазь тонафнема, а теест эрявсь ломань, кинь лангста тиендемс скульптурат. Мон эста цёрась удалафолень, серьс оцюван, тазан. Тунь мялезост, сявомазь. Монць озафан—позировандан, а монць фкя сельмоса ванондан скульпторхнень мельге, кода и мезе тиихть. Тяфта тонафнень. Меле макссть тейне тиемс барельеф. Пяк тусь тифозе учительхнень мяльс. Лама вийда путнень живописти тонафнеманксовок. Мяляфтса, бабанять, конань пяле эрянь квартираса, сембе банканзон-сяканянзон панчфса рисавсине. Ваномок работанень лангс, училищань руководствась макссь тейне возможность максомс нинге весть сяка экзаметтнень, конат ашесть «сяськов» тонафнема кизоть ушетксста, и мон примафолень вольнослушателькс.
Кафта кизода меле тердемазь армияв. Тосонга кядне ашезь юксне скульпторонь тевть. Тиендень фонтатт, героень бюстт.
—А кодамоль дипломнай работаце, мяляфтсак?
—Деряй тя юкстави! Вдь прообразкс теенза арась рьвязе Галина. Сонга тонафнесь тя училищаса. Мархтонза содафтоме армияста мрдамдон меле. Работазень лемоцоль «Эрзява шить ала». Тя ульсь эрзянь щамса паксяса покоди стирь, кона озась пулфнень ёткс ваймама. Тя работать инкса тейне путсть «вете». А омбоце дипломнай работазень, конань тиине И.Е.Репинонь лемса Ленинградскяй художественнай академиять аделамста, лемдине алязти. Тевть лемоцоль «Лесничай». Няфтине тряезень стамокс, кодамокс мяляфтыне шабакс пингстон, мзярда мртцесь вирьста. Лангсонза плащец, пильгсонза кямонза, лафтубрясонза ружьяц. Скульптуразе аф аньцек сатсь «вете», но и няфтьфоль Москуса выставкаса. Марнек группастонк тя выставкас эста кочкафтольхть аньцек кафта работат.
—Николай Михайлович, машты кяттнень алда лисьф скульптуратне лац содафт пяк ламотненди и аф аньцек Мордовияса. Ширезонк сашенды туристтне пара мяльса тиендихть фотографият Семьяти памятникть ваксса, люпшнесазь А.С.Пушкинонь кяденц, Н.П.Огарёвонь лемса МГУ-нь студенттне васетькшнихть М.М.Бахтинонь ваксса и стак тов. Азонтк, кона скульптурать тиемац тейть ульсь сембодонга стакакс?
—Эрть ульсть сонцень тёждя и стака ширенза. Азондан Пушкинонь памятниконц колга. Сон стяфтфоль 2001 кизоня. Тиеськ Н.В.Трибушининонь и С.П. Ходневонь мархта. Мон инголи тиине эскизть, коса поэтть кафцьке кяденза ащесть мяштенц лангса. Оцю инстанцияса проектозень кемокстазь ни, кярьмодеме тевс. Аньцек седиезе аф вастсонзоль, аф мялезоноль мезсь-бди. Шарондонь, шарондонь и сань мяльс шашфтомс поэтть фкя кяденц шири, кода сон тяни ащи. Оду кемокснема проектть ашень карма, мярьгонь, мезе ули, ся ули. Мзярда тиеськ, комиссиясь ванозе и шназе, тяфта, кле, афкукс сяда пара.
Семьяти памятниксь тиевсь сяда тёждяста, но, виденцян, кярьмодень теенза аф мяль вельде. Тяса аньцек-аньцек аделайне Патриархть Никононь и адмиралть Фёдор Ушаковонь памятникснон лангса покодемать, аф азовомшка кода сизень. Скульптуратне кабаконашкат, ламос покодень и тиемстост, и коряваст материалонь кочкамста. Якань кафксть Севастополи, библиотекава. Скульптуратнень тиендеськ Москуть ала мастерскойхнень эса, а тяса ни кочкаськ пяльксонь пялькс.
Бахтинонь сонцень историяц. Тиеманц и путоманц ёткса таргавсь мянь кемгафтува киза. Ульсть эрь кодама туфталхт. А Мокшэрзянь национальнай драматическяй театрать инголе ащи скульптурнай композицияти ваймозень путыне. Щамснон лангса эрь сёрманять рисавсине. Тяни вов тейне сяда стака тяфтама аньцяй детальхнень лангса работамс. Аржанятнень урядамаса тейне лезни цёразе Александр, мезенкса теенза оцю сюкпря.
—Николай Михайлович, а коста сявондьсак, рузкс мярьгомс, вдохновениять? Мезсь максси вийхть покодемс од скульптурань лангса?
—Вирсь, шачема масторсь. Мзярда сизсян, аделсевихть ваймонь эрьгяне, срхксян пангонь кочкама. Тарксян вайме ару кожфса и ванат, прясон эвондакшнихть од мяльхть-арьсемат.
—Мезень лангса покодят тя ёткть?
—Тя пингть мольфтевихть анокламат выставказти, кона лемдеви 70 кизонь юбилеезти. Сон ётафтови С.Эрьзянь лемса музейса ноябрь ковста. А кда корхтамс скульптуранень колга… Тяни кочксемс од тема арси сяда стака, вдь лама мезе ни тиень, лама мезе тисть лиятне и мумс ся аньцек «тоннеть», эсь лацоннеть, аф тёждя. Но мяльхть улихть. Кепотьксонди, пара улель тиемс парковай скульптурнай композиция или мялень салай фонтан. Нинге, койсон, эряви тиемс содаф земляконьконь, офтальмологть В.П.Филатовонь бюстонц.
Кой-коста арьсекшнян, а, пади, тейне кочкамаль живописецонь кить, вдь училищаса тонафнемста педагокне шнакшнезь картинаненге. Кие тяни содасы, кода эста ладяволь эряфозе.

И.Фадеева.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии внедрен безбумажный электронный документооборот

В рамках регионального проекта «Цифровое государственное управление» национального проекта...

Предпринимателей Мордовии научат создавать короткие видео-«REELS»

Министерство экономики, торговли и предпринимательства РМ совместно с Центром...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...