Н.С.Щанкин: «ЛУВОНДСА ПРЯЗЕНЬ ПАВАЗУ ЛОМАНЬКС»

Ня шитнень редакциязонк сашендсь инжи. Тя мокшень пара ломанць, трудонь ветеранць Николай Степанович Щанкин. Аф кржати лувиеньконь эзда сон лац содаф. Трудовой кинц мокшалясь ушеткшнезе школань директоркс, ётазе партийнай школать. Лама киза работац сотфоль национальнай кизефкснень мархта, конат тячивок аф кадондсазь сонь озадонь седихть ащема. Николай Степанович смузю ломань, ёнец оржа, эряфть лангс ваны келиста. А сяс корхнемс мархтонза фалу тёждя и интересна. Улема, аш стама кизефкс, конань лангс сон афоль сода мезе азомс.
Исяк, 27 сентябрьста, Николай Степановичень ульсь шачема шиц—юбилеец. Теенза топодсь 80 киза. Редакцияньконь коллективоц оцю мяльса поздравляндасы сонь иланц мархта. Арьсетяма теенза кемодонга кеме шумбраши, паваз, сетьме и кувака эряф!

—Николай Степанович, ётать эряфонь аф нюрьхкяня ки. Лама тиф, лама сатф. Кой-мезть, шять, пяшкодемс ашезь удала. Целайнек лувондсак пряцень павазу ломанькс?
—Фкя содафозе весть мярьгсь тейне, кле, тняра киза покодеть, а оцю должностть ашеть сата. Пеедезевонь каршезонза. Аф «сери» васттнень мельге, мярьгонь, панцень, аф эсост няине павазозень. Эряфса тейне васенце вастса фалу ульсь ломаттненди цебярь тевонь тиендемась. Лад седизон, мес ламотне тянкса лятфнесамазь пара валса. Вов мезенкса мон маряса прязень павазу ломанькс. А нинге мон павазуван, мес эряфоньберьф вакссон кельгома рьвязе. Эрятама марса 55 киза и вестевок ашеме сялонкшне. Марян оцю гордость полазень и семьязень инкса!
—Кодама лямбоста корхтат мала ломаттнень квалма. Азонтт аф ламня колгаст.
—Рьвязе, Нина Андреевна, мокшава, шачемас-касомас коре Зубово-Полянскяй райононь Свеженькая посёлкань. М.Е.Евсевьевонь лемса МГПИ-ть шумордамда меле работась Ковылкинскяй райононь Казённый Майдан велеса, ульсь завучекс, а сяльде покодсь преподавателькс пединститутса (тяни педуниверситет). Стиреньке, Наталья, шумордазе Н.П.Огарёвонь лемса МГУ-нь экономическяй факультетть. Меле покодсь преподавателькс тя вузса. Тяни работай Москуса, РФ-нь Образованиянь и наукань министерствать видеса Научно-исследовательскяй институтонь научнай секретарькс. Уноконьке, Дарья, аделазе университетонь математическяй факультетть, работай программистокс Москуса. Нина Андреевназень мархта ули идень уноконьковок. Варенькати 3 кизот 8 кофт.
—Сембода валда и лямбе лятфнематне—нят сят, конат сотфт идькс пингть мархта. Николай Степанович, лятфтак тонценнеть колга.
—Ковылкинскяй райононь Од Пшень велеста молихть юрне. Семьясонк шачсь 12 идь, но шиса лядоме аньцек колмоненк. Алязе, Степан Фёдорович, Великай Отечественнай войнань ветеран, пачкодсь Берлину. Рейхстагть зданиянц лангс сембе кядьснон путнезь, а сон аф грамотнаель, путсь крёз. Эстоньбере и макссь эстеенза вал, кда ляды шиса, шабанзонды обязательна максы образования. Тяфта и тись. Тячемс спасибан теенза тянкса. Войнада меле алязе работцесь колхозса пожарнайкс. Тядязе, Евдокия Никитовна, вятсь подсобнай хозяйства, касфтсь итть. Шабакс пингозе прась войнада мельдень стака кизотненди. Савсь содамс и вачашить таньфонц, мзярда наксада модамарьда башка шра лангса мезевок ашель. Родительне рана тонафтомазь трудти. Школавга нинге ашень яка, но жуватанди палаксонь сязендемась, пенгянь, ведень каннемась мельганотольхть. Мяляфтса, пуроптама ялгань келеса, васенда марса фкять тевонзон тисаськ, тоса—омбоцеть. А сяльде Исса ляи эшелякшнема ласьктяма. Вейхкса кизоса тонадонь ни тишень лядема. Курмозьшка цёраня, а пеелемозень яфиине аф оцюда кальдявста. Шити ниле тачкат тише эрявсь ускомс. Аф лядят сняра, шовонти пови, лядят—алня максыхть. А кизоньберьф эрявсь марнек кудботмарсь пяшкодемс.
Эсь велесонк шумордайне школать. Аф отличниколень, но тонафнень аф кальдявста. Математикать мархта ашень ялгафта, а вов гуманитарнай наукатне—тя моннель. Сяс кагоднень максыне Н.П.Огарёвонь лемса МГУ-нь филологическяй факультету. Аделайне национальнай отделениять.
—И эстокиге, ёфси од цёракс, путфолеть-кочкафолеть школань директоркс. Тевсь аф тёждя и пяк ответственнай. Аф пельксоль?
—Шарьхкотьф, таколдонь. Пелень аф сафтови. Школаса ся пингть тонафнесь ниле сятта лама шаба, работась ведьгемоньда лама учитель, а стане жа аф фкя лацонь техническяй работник. Сембонь мархта эрявсь мумс марстонь кяль. Оцю лезкс од тевсон макссесь ингольдень класснай руководителезе, математикань тонафтысь Ф.Т.Аронов. Целайнек педагогическяй коллективсь примамань лац. Ульсть, конешна, и «лия шири ускихть», но колгаст лятфнема аф карман.
Школав самстон ладянь соткст колхозонь эстонь председательть И.Ф.Скворцовонь мархта (и тянксовок сюконян алязенди эсь пингстонза тонафтоманкса). Сон школати машина макссесь пенгянь усксемс, а тонафнихне и коллективсь меле лезнесть колхозти сёронь урядамаса. Монцьке ётксостолень. Вов тяфтамоль фкя-фкянди лездоманьке.
Школаса работань аф ламос—кафта кизот. Меле кандидатуразе кочкафоль комсомолонь Ковылкинскяй горкомонь секретаренди. Тевсь шарьхкотьф, ответственнай, сяс согласиндань аф эстокиге. А сяльде, работамок мзярошка пинге, тусь мялезон. Сашендовсь васетькшнемс велень труженикнень, од ломаттнень мархта, вятемс мархтост учебно-воспитательнай, трудовой работа. Тя тевса тейне пяк лездсь учительскяй опытсь. Башка мяль эста шарфневсь патриотическяй воспитанияти. Сидеста пуропнема васедемат Великай Отечественнай войнань ветераттнень мархта, конатненди фалу ульсь мезе лятфтамс-азомс, мезти тонафтомс оттнень.
—Николай Степанович, а кодамот мяльхне-арьсематне, тяниень од ломаттнень колга? Эряфкшуфнень ширде аф шуроста сашендови кулендемс лемозост «аф шнамань» валхт.
—Виде. Коста аф коста кулендят тяфтама корхнемат, кле, тяниень оттне аф стамот, кодаптолеме минь. А мес, кизефтян, теест улемс минь лацонк? Эряфсь аф ащи фкя вастса, моли инголи, полафни. Мархтонза полафнихть и од ломаттне. Тяни синь сяда оцюфт возможностьсна информациянь сатомаса. Эряфсост компьютерсь, Интернетсь занцихть оцю васта. Но фкять коряс—воспитаниять—эряви работамс.
—Аф фкя киза покодеть МР-нь Национальнай политикать коряс Госкомитетса. Мезьса мяляфтовсь тя пингсь?
—2001 кизоня кярьмодень тевс тя вастса. Лама кизода инголе Эстониянь Тарту ошса рьвязе аралась диссертация. Монга улень мархтонза. Тяса тись доклад фкя академик, кона содась мянь 33 кяль. Тя академиксь лама корхтась нароттнень эсь лацонь шиснон ванфтоманц колга. Валонза сувасть седизон и арасть кинь няфтикс сяда товолдонь эряфсон и работасон.
Национальнай политикать коряс Госкомитетть тяза самстон вятезе А.А.Утешев, а кизонь ётазь председателькс арась А.С.Лузгин. Александр Степановичень мархта марса работаме пенсияс лисемозон, улеме цебярь ялгакс.
Ся кизотнень вятеме оцю работа школатнень эса мокшень и эрзянь кяльхнень тонафнемаснон коряс. Лама тифоль ширеса эряй мокшэрзятнень мархта соткснень кемокснеманкса. Ламоксть сашендовсь улендемс лия региоттнень эса, корхнемс ломаттнень мархта. И сембе вастова мушентфоль шарьхкодема.
—А тячи, кода арьсят, сатомшка мяль шарфневи национальнай кизефксненди?
—Работа мольфтеви, но кой-кона ширетнень коряс сон, тейне-арам, виияфтомаль. Сяда оцю мяль эряви шарфтомс школатнень, вуснень эса кяльхнень тонафнемаснонды, национальнай кадратнень ширеснон кирдеманцты.
—Николай Степанович, койсот, мезсь эряфса инь питнись?
—Инь питнись эряфса—семьясь, штоба сон улель шумбра и павазу.
—А мезсь сембода аф эрявикссь?
—Сельмонь каямась. Мон эряфоньберьф сельмоткшнень аньцек математикненди, сяс мес эстейне ашезь сафнев тя наукаса, и музыканттненди, сяс мес вайгялень ширде «ашуван».
—Николай Степанович, пенсияса улемстот кода ётафнесак пингцень?
—Калхт аф кунцян, охотендама аф яксян. Кельгса шахматса налхкомазень. Кизонда пара мяльса дачаса возсян. Касфнян перень сёрот и …панчфт. Пяк кельгсайне панчфнень.
—Корхтайхть, сембода цебярь тонафтысь—тя эряфсь. Тонь мезти тонафтонзе?
—Улемс пара ваймокс, кельгомс ломаттнень, лезнемс теест. Тяфта мон эряфоньберьф и тиендень.
—Сюкпря!
Ольга Евдокимова.

Российскяй Федерациянь Сенаторсь Пётр Тултаев:
—Николай Степанович афкуксонь мокшень патриот. Седиец фалу пичеди народоньконь, сонь культуранц, кяленц инкса. Кодама вастса афоль работа, прянц няфнезе цебярь государственнай деятелькс, тевонь содайкс, тевонь маштозь тиикс. Николай Степановичень содаса лама киза и аф лотксян дивандакшнемда сонь смузьшинцты. Сон ся ломаттнень ёткста, конат валснон шавос аф азонкшнесазь, тевснон тисазь инголенди лац-ряц арьсезь-смеказь.
Кеме шумбраши тейть, кельгома Николай Степанович! Катк эряфце ули павазу и валда!

Мордовскяй (мокшень и эрзянь) народть Межрегиональнай общественнай организациянц председателец Юрий Мишанин:
—Мон пяк павазуван, мес мзярда-бди эряфонь китне-яттне содафтомазь тяфтама ломань мархта, кода Николай Степанович Щанкин. Сон минь республиканьконди—живой история. Няезе-содазе советскяй эряфть, ётазе партийнай школать, а сяс теенза фалу ули мезе лятфтамс, азондомс корязонза оттненди, тонафтомс. Николай Степановичень советонза тейнек пяк питнихть. А нинге сон няфни цебярь пример эрьгавшинц мархта. Ванат лангозонза и эвондакшни мяльце и эрямс, и работамс.
Лядонтт фалу тяфтамокс, кельгома Николай Степанович! Эряк шумбраста и ламоняс!

Пенза ошста общественнай деятельсь Сергей Пиксин:
—Николай Степановичень содаса комозьшка киза ни. Содафтоме Национальнай политикать коряс Государственнай комитетса покодемста. Эстокиге муме марстонь кяль и вов ни мзяра киза минь цебярь ялгатама. Николай Степанович ламоса ащи тейне цебярь кепотьксокс. Сон смузю и пяк порядочнай ломань. Фалу содасы мезе тиемс и кода тиемс. Мон тячивок сидеста пшкятькшнян теенза советонкса, ёнюста азф валонза ламоксть лезнесть тейне эряфса и работаса.
Юбилейцень мархта, кельгома ялгай! Шумбраши, паваз и сембе цебярть!

Последние новости

РОССИЯНЬ ВОИНСКЯЙ СЛАВАНЬ ШИСЬ

23 февральсь—Отечествань Аралаень шись. 1918 кизоня тифоль Рабоче-Крестьянскяй Якстерь...

Госкомпании увеличили закупки у малого бизнеса Мордовии почти на треть

Общероссийский объём закупок крупнейших заказчиков у субъектов МСП по...

В Мордовии завершается строительство дома-интерната для престарелых и инвалидов

В Ичалковском районе завершается большая стройка. В рамках федерального...

Мазыхть мокшень стиреньке

Бта нинге аф кунара, мелять песта, «Мокшень правдась» тись...

Родькиттнень семьясна сувась сяськихнень лувксс

Аф кунара Москуса «Россия» Международнай выставкать видеса ётафтовсь «Родные—Любимые»...

Ётась эряфонь кувака ки

Мокшень писательсь Тимофей Андреевич Кирдяшкин сась мокшэрзянь литературав 1950...

РОССИЯНЬ ВОИНСКЯЙ СЛАВАНЬ ШИСЬ

23 февральсь—Отечествань Аралаень шись. 1918 кизоня тифоль Рабоче-Крестьянскяй Якстерь Армиясь.1993 кизонь 8 февральста Российскяй Федерациянь Верховнай Советть Президиумоц примась «Российскяй Федерациянь знаменательнай шить—Отечествань Аралайхнень...

Команда проекта #ПатриотКрафт из Мордовии провела мастер-класс по разработке сценариев патриотических игр в Мытищах Московской области

19 февраля в г. Мытищи Московской области на площадке АНОО «Ломоносовская школа-Зеленый мыс» прошел очередной мастер-класс по разработке сценариев патриотических игр, организованный командой грантового...

Госкомпании увеличили закупки у малого бизнеса Мордовии почти на треть

Общероссийский объём закупок крупнейших заказчиков у субъектов МСП по итогам 2023 года вырос до рекордных 8 трлн рублей. Благодаря национальному проекту «Малое и среднее...