Надияфтсть мрдафтомс добувафонц

Кода пачфневи «Стопмошенник13» телеграм-каналса, Россиянь УМВД-ть Саранск ошень округть эзга 4№ полициянь отделонц дежурнай частезонза пшкядсь 57 кизоса ава, кона пачфтезе, што аф содафне васькафтозь салазь сонь 3 миллиотт 359 тёжянь 175 цалковаенц.
Содавсь, што мелянь июньцта теенза гайфтсь бта юридическяй компаниять представителец и мярьгсь, што анок максомс лезкс ся ярмакнень мрдафтомаснон коряс, конатнень авась юмафтозень 2018 кизоня. Кода содавсь, сон афкукс, вете кизода инголе, арьсесь добувамс брокерскяй платформать лангса. Тянкса сувафтсь Японияса банкть счётс 374400 цалковай и меки синь теенза ашесть лихтев. Гайфтись шарфтсь мяль, што фирмасна кунара ни лезни мрдафтомс ломаттненди ярмакснон, тяконь лувксса омба масторонь банкнень эса панчф счёттнень эзда. Авась кулхцондозе сонь. Аф содафсь кучсь заявления и договор, конатнень алу авась путозе кяденц и мрдафтозень синь сообщениять вельде. Сяда тов алясь мярьгсь ладямс соткст банкть мархта и содамс кодама сумма ули счётса. Авась тяштсь финансовай учреждениять электроннай почтазонза сообщения, реквизиттнень теенза азозень гайфтись. Омбоце шиня тага ульсь гайфтема бта Япониянь банкть представителенц эзда. Сон мярьгсь, што авать счётса ули 78240 доллар. Выпискать получаманц и ярмакнень лихтемаснон инкса авась сяка электроннай адрести кучезень эсь паспортонц копиянц, несколька документтнень, конатнень алу путозе кяденц—нят ульсть финансовай учреждениять условиянзонды согласиянь максомань каготт. Получаф сёрмать вельде файлатнень авась кучезень фирмань сотрудникти. Меле, аф содафнень инструкцияснон коряс, теенза эрявсь пандомс 8400 доллар. Марнек суммась ашель, сяс эсь ярмаконзон эзда сон ётафтсь азф счётти 419500 цалковай, а 350000 тёжянь цалковайть инксонза бта ётафтозе счётти алясь, кона лездсь теенза. Августста авать мархта ладясь соткст налоговай службань сотрудниксь, кона мярьгсь, што Алма-Атань банкть вельде поступайхть сонь счётозонза ярмакт, но декларациять лиссь пингоц и эряви пандомс налогть и шумоть—сембоц 1 миллион 524 тёжянь 675 цалковай. Сентябрьста авась получась сообщения, што сонь банковскяй счётозонза сась 3000 доллар, но синь получаманксост эряви ётафтомс нинге 715000 цалковай. Тяда меле тага гайфтсь аф содафсь, кона пачфтезе, што Нижнекамск ошть маласа муф автомобиль, коса сонь лемозонза катфт документт и ярмакт. Синь получаманксост авась ётафтсь 700000 цалковай, конатнень сявозень шумос содафонц кядьста. Авась ёрась гайфтемс юридическяй фирмать представителенцты и ёрась пачфтемс тянь колга, но телефоноц ашезь отвеча. Арьсемок, што сонь тага васькафтозь, авась пшкядсь полицияв, няфтемок сембе документтнень копияснон и мессенджерса перепискань скриттнень.
Тяниень пингть сотцеви, мезе лиссь и кит ся ломаттне, конатнень мархта авась кирдсь соткст.
Мордовиянь внутренняй тевонь оргаттненди январьста мошенничестватнень и банковскяй счётста ярмакнень саламаснон коряс пшкядсь 82 эряй. Сембоц синь юмафтсть 20,5 миллион цалковай.