5 августста Саранскяйса ульсь торжественнай пуромкс, конань пингста максфоль «Геройхнень пингсна» народнай васенце премиясь. Сон лемдевсь святой праведнай воинть Феодор Ушаковонь канонизациястонза 21 кизонь топодемати. «Саранск Арена» спортивнай комплексу пуромкшнесть Мордовиянь простой ломаттне, конат тисть кодамовок подвиг—аралазь кинь-бди эряфонц, лемдезь эряфснон оцю и эрявикс тевонди, волонтёрствати, социальнай работати и стак тов. Иласа примась участия Мордовия Республикань Оцюнясь Артём Здунов. Стане жа ламоль почётнай инжида. Ётксост Российскяй Федерациянь сенаторсь Пётр Тултаев, РФ-нь Государственнай Думань депутатсь Юлия Оглоблина, Россиянь Геройсь Владимир Дежуров и лият.
«Геройхнень пингсна» проектть эряфс ётафнесы «Подвикне» автономнай аф коммерческяй организациясь, кона 2013 кизоста сявомок пачфни странань эряйхнень героическяй тевснон колга. «Подвиги» командать спецпроектоц няфтьфоль культурнай инициативань Президентскяй фондть колмоце специальнай конкурссонза и сатсь 9,3 миллион цалковаень лувксса грантовай лезкс. «Геройхнень пингсна» премиясь арась духовно-нравственнай питнишинь эсь лацонь символкс.
Премиянь получаманкса максфоль 500-та лама заявка Мордовиянь эряйхнень эзда, конат няфтезь пряснон афкусонь геройкс. Сембода мялень салай и седиень токай историятнень инкса вайгяльснон максозь 380 тёжяньда лама ломанць. Геройхне кочкафтольхть вайгялень максомать и экспертнай советть азоманц мяльс сявозь.
«Тячи святой праведнай воинть Феодор Ушаковонь лятфнема шистонза минь ётафттама пяк эрявикс мероприятия и Мордовияти, и Россияти. Президентоньконь Владимир Владимирович Путинонь, культурнай инициативань Президентскяй фондть ширень кирдемаснон вельде тейнек ули кода тиемс тя проектть национальнайкс»,—мярьгсь республикань руководительсь Артём Здунов, азомок благодарностень валхт Мордовиянь народть эзда государствань Оцюняти тяфтама проекттнень ширеснон кирдеманкса.
Спасибамань валхт азфтольхть проектть аноклаензонды и сембонди, кит кирдезь сонь ширенц, тяконь лувксса Мордовиянь предпринимательскяй сообществати и лична МР-нь промышленниконь и предпринимателень союзть председателенцты Виктор Бирюковонди, кона азсь мяль эрь кизоня ётафнемс тя премиять республикаса и надияфтсь, што бизнессь кирдьсы ширенц.
Мордовиянь геройхненди статуэткатнень и диплопнень максомда инголе республикань Оцюнясь казезе Россиянь Геройть, лётчикть-космонавтть Владимир Дежуровонь, максомок теенза Славань II степенень орден. Сяльде сценать лангс фкя-фкянь мельге лисендсть «Геройхнень пингсна» народнай премиянь сатыхне. Сембоц 22 ломань. Тяфта, «Герой по призванию. Огнеборец» номинацияса сяськсь профессиональнай спасательсь, мокшень од алясь Александр Безбородов. Сон аралазе палы кудста авать атнай шабанянц мархта. «Призванияс коре геройкс» арась республикаса международнай классонь фкя и тяка спасательсь Антон Макаров. Василий Мартынов, кона аралазе вете ковонь иднять афтерькс алянц эзда (сон цють ашезе ёрда цёрокшкять вальмава), арась «Правопорядкань геройкс». «Миронь геройхть» номинацияса сяськсь Равиль Халиков, Мордовияса шачфсь-касфсь, Донецкяй Народнай Республикань Геройсь.
Кядень кайги цяпамаса васьфтьфоль Дмитрий Ожогинонь сценати лисемац. Сон сяськсь «Преодолениянь геройхть» номинацияса. Художниксь, кона 23 кизоса сокоргодсь, но ашезень нолда кядензон и арась профессиональнай массажистокс. «Спортонь геройкс» лувф содаф легкоатлетсь Денис Нижегородов, «Образованиянь геройкс»—Клавдия Шуляева—40 кизонь стаж мархта Мордовиянь Заслуженнай учительсь.
«Медицинань геройкс» аф фкя лацонь номинацияса арасть Республиканскяй инфекционнай клиническяй больницянь анестезиологсь-реаниматологсь Константин Жирнов, пря уйть лангс уникальнай операциянь тиенди врачсь Алексей Ховряков и Мордовиянь главнай хирургсь, кардиохирургиянь научнай центрать пуроптыец Владимир Ипатенко.
«Меценатствань герой» номинацияса сяськсь Евгений Ледяйкин, кона эреклафнесы Паракино шачема веленц и панчсь «Пайчалга» мокшэрзянь кухнянь комбинат, а «Велень герой» номинацияса—почтовай связень Темниковскяй отделениянь почтальонць Любовь Сидорова, конань трудовой стажец 25 киза.
Мордовиянь инь оцю семьясь—Темникавста Висюлькиттне—арась сяськикс «Семьянь герой» номинацияса. Мирттне-рьвятне Елена и Александр касфтыхть 18 шаба, 12-сь конатнень ёткста—приёмнайхть.
Народнай премиянь максомань церемонияс сашендсь аф кржа инжи лия ошста. Ётксост Ростов-на-Дону ошть маласта Рассвет посёлкань эряйсь Татьяна Сорокина. Татьяна Васильевна Россиянь инь лама шабань тядясь—сонь 2 родной и 83 приёмнай идец! (синь шачфтсть ни теенза 50 унок и уноконь 12 идь).
Мероприятияс тертьфоль и аф кржа содаф творческяй коллектив и артист. Сценать лангса выступандасть Сретенскяй монастырень хорсь, певицась Юлия Михальчик и лия музыкантт.