Торбеевскяй райононь Красноармейский посёлкаса фельдшерско-акушерскяй пунктсь панчфоль 2019 кизоть васенце пялестонза. Эсонза ули сембе инь эрявикссь: кушеткат, медицинскяй креслат, лекарствань ванфтомс шкафт, санузел и стак тов. Посёлкань эряйхненди макссеви медицинскяй эрявикс сембе лезкссь. И тиендьсы тянь фельдшерско-акушерскяй пунктть заведующаец, фельдшерсь Николай Малянов. Николай Николаевич тяса работай аф кунара—сась меля «Земский фельдшер» государственнай программать коряс, но кенерсь ни арамс эсь ломанькс. И нинге. Тяниень пингть фельдшерско-акушерскяй пунктса работай ськамоназа.

Шачемас коре цёрась аф Торбеевскяй, а Зубово-Полянскяй районцта. Ёмла родинац—Лесной посёлкась, коса тонафнесь школаса, а 9-це классть шумордамдонза меле поступась Темниковскяй Медицинскяй училищав (тяни колледж). Мес сась мяльс сотомс эряфонц медицинать мархта? Вов мезе сон отвечась тянь лангс:
«Тя профессиясь фалу мялезоноль. Ёрань лезнемс ломаттненди шумбрашиснон мархта сотф тефнень эса. Врачне, медицинскяй сестратне, фельдшерхне няевсть тейне пара вайме, лиянь ужяльди, лезды ломанькс. Медицинскяй сестракс пяк лама киза работай алязень сестрац Елена Буртасова. Ули кода азомс, што Елена Николаевна арась тейне кепотьксокс сай пингонь профессиязень кочкамста».
Медицинскяй колледжса Николай Николаевич васенда тонафнесь медицинскяй брадокс. Содамошинь кочксемста сатфксонза аф кальдяфтольхть, сяс меле ётась фельдшеронь специальностти.
Сембоц тонафнесь вете кизот. Колледжть шумордамдонза меле фельдшерсь Николай Малянов служась армияса Ярославльса машина кинь войскаса. Армиясовок лезнесь ломаттненди: санитароль. Демобилизацияда меле мрдась Зубово-Полянскяй району, коса кой-мзярс работась фельдшеркс колонияса.
И тяса, кода корхнихть, эсь тевонц тиезе судьбась. Николай Николаевичень стирь ялгац, Александра Левина, шачемас коре Торбеевскяй райононь Красноармейский посёлкаста, сон и азозе, што теест фельдшерско-акушерскяй пункту эряви медицинскяй работник.
Александра Сергеевна тонафни Темниковскяй Медицинскяй колледжса, кармай медицинскяй сестракс.
Фельдшерсь Николай Малянов арьсесь-тись и сась работама Красноармейский посёлкав «Земский фельдшер» государственнай программать мяльса кирдезь. Валонзон коряс, фельдшерско-акушерскяй пунктса эста кивок ашезь работа.
Тяни заведующайть, фельдшерть участкасонза 300-та лама ломань. Васенда од вастса прянц марязе апак тонатт. Пингонь ётазь сембось ладявсь. Эрь шиня фельдшерско-акушерскяй пункту сайхть Красноармейский посёлкань эряйхне. Николай Николаевич макссесы медицинскяй васенце лезксть, ётафни осмотрат, процедурат, вакцинацият. Кда эрявксты—сонцьке якай кудга. Рабочай недяляц понедельникста сявомок ёткшити молемс, но гайфнихть теенза и ваймама шиста, и поздна илять, и, кда эрявксты, ветьке.
Цёрась мушенды марстонь кяль эрть мархта. Сон шназень посёлкань эряйхнень. Кой-кит, кле, сашендыхть ФАП-у пара валонкса, сембода сидеста—эряфкшуфне. Тявок шарьхкодема.
Эряй фельдшерсь Красноармейский посёлкаса, маластонь пингть Александра Сергеевнань мархта арьсихть рьвяямс. Ваймама шитнень эряскоды Зубово-Полянскяй району Лесной посёлкав шачфтыензон-касфтыензон шири.
Маластонь кизотненди Николай Маляновонь планонза тяфтапт: эрямс и работамс Красноармейский посёлкаса, макссемс медицинскяй лезкс тястонь эряйхненди.
Татьяна Альшина.