Няфтеви Михаил Девятаевонь подвигонц колга спектакль

Мокшэрзянь национальнай драматическяй театрать «STOP Фашизм» проектоц сяськсь Россиянь Культурань министерствать целевой грантонь максомань конкурссонза. Видесонза ётафтови аф фкя мероприятия. Сембода оцюсь—земляконьконь, Советскяй Союзонь Геройть, мокшалять Михаил Девятаевонь колга спектакльть путомац.
Пьесать мокшень кяльса сёрмадозе Мордовиянь Народнай писательсь, драматургсь Валентина Мишанина. Юркс арась Девятаевонь автобиографическяй книгац, конань эса геройсь азондозе, кода идькс пингста сявомок ёрась тонадомс вятемс самолёт, кода Оренбургскяй авиационнай училищать шумордамдонза меле, 1941 кизоста сявомок, тюрсь фашисттнень каршес, а 1944 кизоня контузиянь получамада меле повсь пленц, кода аф весть ёрась ворьгодемс и кода лия пленнайхнень мархта ворьгодсь немецонь концлагерьста, сявомок военнай аэродромста врагонь бомбардировщикть.
Валентина Ивановна содазе Михаил Петровичень, сон корхнесь мархтонза сельмоста сельмос. Сяс документальнай произведенияса кармайхть лётчикть биографияста ламотненди аф содаф фактт.
Пьесать лемоц стама жа, кодама Михаил Девятаевонь автобиографическяй книганц—«Адста ворьгодема».
«STOP Фашизм» проектсь ащи кой-мзярошка пяльксста. Васендакиге, тя Саранск ошень Воинскяй славань музейть мархта вастста вастс ётафневи фотовыставкать анокламац. Фотографиятнень эса няфтевихть Великай Отечественнай войнань стака кизотне, концлагерьса улемась. Тиеви Михаил Девятаевонь бюстоц, конань няйсы спектаклень эрь ванысь. Снимандави «STOP Фашизм» ролик, конань эса азондови фашизмать сяськомаса Россиять вастонц колга. Спектакльсь ётафтови тифлокомментированиянь кяльс и няфтеви кальдявста няи или сокор ломаттненди «Особый взгляд» проектть мяльса кирдезь. «Адста ворьгодема» постановкась няфтеви Мордовиянь райоттнень эса, кармайхть гастрольхть Татарстану, коса Михаил Девятаев тонафнесь, работась, пуроптсь семья. Тяфта проектсь нинге сяда кемокстасыне национальнай кафта республикатнень, Мордовиять и Татарстанть, ёткса соткснень. Стане жа «STOP Фашизм» проектть видеса театрать ёмла залсонза ётафтовихть школьникненди мероприятият, конатнень пингста азондови фашизмать, кода тяниень пингонь явлениять, колга.
Мокшэрзянь национальнальнай драматическяй театрать директороц Светлана Дорогайкина мярьгсь: «Спектакльхне, конат лемтьфт странаньконь историческяй событиянзонды, занцесть и занцихть оцю васта театрать репертуарсонза. Тя проектть эряфс нолдаманц пингста тиеви архивнай материалонь оцю исследования, сёрмадови документальнай драматургическяй текст. «Адста ворьгодема» спектакльсь поладсы «Великие сыны Мордовии» циклать, конань вятьсы театраньке. Тя циклась азонды Мордовиянь ся ломаттнень колга, конат кадсть пильгокит российскяй и мировой историять и культурать эса. Лятфтасаськ «Эрьзя. Летящий к свету» спектакльть. Тяни тя циклать поладсы Михаил Девятаевонь колга постановкась. Од ломаттненди эрявихть содамс героеньконь!»
Оксана плотникова.