24 декабрьста, Саранскяйса, Мордовия Республикань Пресс-центраса ётафтовсь илань шитнень общественнай порядкать ванфтоманцты, идень аф пелькс ваймамати, мошенничествать инголдаманцты, кибербезопасностти лемтьф пресс-конференция.
Эсонза примасть участия Мордовия Республикать эзга Росгвардиять Управлениянц, Мордовия Республикать эзга Внутренняй тевонь министерствать, Россиянь ФСБ-ть Мордовия Республикать эзга Управлениянц, Россиянь Следственнай комитетть Мордовия Республикать эзга Следственнай Управлениянц Российскяй Федерациянь МЧС-ть Мордовия Республикать эзга Главнай управлениянц представителенза.
Васенцекс корхтась Мордовия Республикать эзга МВД-нь общественнай порядкать ванфтоманц Управлениянц начальникоц полициянь полковниксь Виталий Хапиков.
Виталий Сергеевичень валонзон коряс, Внутренняй тевонь министерствась од кизонь илатнень анокламаснон и ётафтомаснон пингста кармай работама службань кандомань виияфтф вариантса. Массовай пуромкснень ётафтомань сембе вастснон эса кармайхть улема полициянь сотрудникт. Ирецтотне тяфтама васттненди нолявома аф кармайхть. Уликс законодательствать коряс, аф совершеннолетняйхненди аф мярьгондеви улемс общественнай васттнень эса ветемба. Тянь сявома мяльс синь тядяснонды-аляснонды. Водительхненди ванома скоростной режимть мельге, аф озсема рульть ваксс алкоголень симомда меле. Шабатнень машинаса усксемстост тевс нолямат тянди тиф приспособлениятнень.
Мекольдень пингть Россияса эвондасть мошенникт, конат тя или тона туфталхнень сюнеда кошярясазь ломаттнень противоправнай действиянь тиема. Гайфтемста кой-коста азондсазь пряснон правоохранительнай органонь сотрудникокс. Мяляфтость и пачфтесть лиятненди: правоохранительнай органонь фкявок сотрудник аф кармай гайфнема вяре азфть коряс!
Республикань Оцюнять Указонц мяльс сявозь, Мордовиять территориянц вельхксса аф мярьгондеви нолямс пилотфтома лиенди аппаратт. Кда кивок няи тяфтама, гайфтема 47-77-71 или 102, 101, 112 телефоттнень коряс.
Россиянь ФСБ-ть Мордовия Республикать эзга Управлениянц пресс-службанц сотрудникоц Екатерина Кондратьева поладозе мошенничествать мархта сотф темать. Екатерина Валентиновна азозе, што мошенникне аф аньцек салсесазь ломаттнень кочкаф ярмакснон, но и тифнихть кядьстост противоправнай действият, кепотьксонди, мезевок крьвястьфнихть. Ужяль, ня провокациятнень лангс повондыхть хуш кодама кизоса ломаттне: пенсионерхнень эзда сявомок тонафнихненди молемс. Эряви корхтамс эряфкшуфнень и иттнень мархта, штоба синь афольхть отвечсе аф содаф номерхнень эзда гайфтематнень, сембода пяк мессенджерхнень коряс сафнень лангс.
Безопасностень федеральнай службань фкявок сотрудник оперативно-розыскной мероприятиятнень ётафтомста мзярдовок аф кармай гайфнема мессенджерхнень коряс, прважсема служебнай удостоверениянц копиянц. Кда кивок гайфти и азсы прянц ФСБ-нь сотрудникокс, путома трубкать. А меле гайфтема правоохранительнай оргаттненди. УФСБ-ть дежурнай службанц телефононь номероц 28-28-28.
Россиянь Банкть Волго-Вятскяй Главнай управлениянц Мордовия Республикать эзга Национальнай банкть Отделениянц—безопасностень отделть начальникоц Александр Петров пачфтсть кибермошенничествать каршес тюремать колга. Мекольдень пингть мошенникне коль сяда сидеста «равжа» тевснон мольфтьсазь онлайн-банкнень и перевоттнень ётафтомаснон вельде. Нинге синь тиендихть финансовай сайтт.
Пресс-конференцияса корхтасть Следственнай Управлениять, Росгвардиянь Управлениять, МЧС-нь Главнай управлениять представительсна.
Татьяна Альшина.