ОЧАКОВ КРЕПОСТТЬ СЯВОМАЦ

1788 кизонь 17 декабрсь Россиять историяса лятфнемань дата. Тя шиня 1788 кизоня рузонь войскатне князть Григорий Александрович Потёмкинонь командованиянц ала сявозь Очаков турецкяй крепостть. Очаковсь ащесь Равжа морять трваса Днепрать ляень прама вастонц маласа.
Русско-турецкяй войнать пингста, кона ушедсь 1787 кизонь 13 (24) августста, военнай тефне мольфтевсть фкя пингть кафта вастова—Крымса и Севернай Кавказса. Очаков крепостть инкса тюремась, конань вельде ульсь кода кирдемс контроль Днепрань лиманть лангса, арась фкя инь оцюкс и мяляфтовикс тя войнаса.
1788 кизонь 6 (17) декабрьста 7 частста шобдава ушедовсь Очаков крепостть штурмоц. Васенда фатяфтольхть Очаковть и Гассан-пашань замканц ёткса модань турецкяй укреплениятне. Меле рузонь войскатне врьгятсть модань центральнай укреплениятнень лангс и лиссть крепостень ортатненди и бастиоттненди. Улемок кяшфокс артиллерийскяй толть мархта, гренадёрхне ётазь крепостень стенать. Крепостьса тюремась мольфтевсь кафта частть малава.
Штурмть пингста князсь Г.А.Потёмкин ульсь батареятнень эзда фкаса и ванць семботь мельге. Мзярда теенза вятезь крепостень комендантть, Гуссейн-пашань, генералсь-фельдмаршалсь кяжиста мярьгсь: «Тонь аф кулхцондыкс улемацень инкса лиссь веронь тя шудемась». Мезть лангс сон отвечась: «Кадыть шава апрякаматнень, мон пяшкодине эсь долгозень, кода тон тонценнеть, судьбась тиезе эсь тевонц».
Очаковть сявоманкса князсь Потёмкин Екатерина II эзда получась оцю казне—Святой Георгиень I степенень орденонц, бриллиантса мазоптьф шпага и 100 тёжянь цалковай. Казнет получасть и лия участникне.