Оцю букваста Учитель

Педагогическяй трудонь ветеранць, Мордовия Республикань Заслуженнай учительсь, мокшавась Нина Николаевна Кинякина Зубово-Полянскяй райононь Жуку велень школати лемдсь 56 киза. Тяни пенсияса, но эсь тевонцты и марнек национальнайти кельгомань толнясь палы эсонза кода пяле векта инголе. Лиякс аш кода, вдь тняра киза вятсь школаса мокшень кялень и мокшэрзянь литературань урокт. Районца сон ульсь кепотьксокс лиятненди, теенза сашендсть учительхне содамошинь касфтоманкса. Учениконза мокшень кяльть и мокшэрзянь литературать коряс сембе пинкнень ульсть инь виихнень ёткса. Оцю мяль Н.Н.Кинякинать тевонц лангс шарфнесь и Мордовиянь эстонь Оцюнясь Н.И.Меркушкин, мзярда сашендсь Жуку вели. Аш кода аф дивандамс велень школать краеведческяй музеенц лангс, конань кочказе родной кялень учительсь тонафниензон мархта. Но аф аньцек учителень тевонзон коряс содаф Нина Николаевна. Пцтай 20 киза сон тиенди мокшень мазоптомбяльхть.

Нина Николаевнань мархта васетькшнень ширесонза, Жуку велеса. Эстокиге шарфтонь мяль «Мокшень правдать» лангс, кона шранц лангсоль.
«Тяни ни афи лятфтави, мзяра киза сёрматфнеса тя газетать. Сон пяк мялень салай. Монценьге аф оцю материалне лисендсть лопанянзон лангса»,—азозе Нина Николаевна.
«Ётай веконь нильгемонце кизотнень, улема, сембе эрясть аф козяста. Но минь, тейне-арам, улеме инь ашукс марнек Оцяду шачема велесон,—ушедозе азондоманц Нина Николаевна.—Тядязень, Прасковья Петровнань, васенце мирдец шавовсь финскяй войнаса. Омбоцеда лиссь рьвакс алязти, сявок тусь войнас. Шарьхкотьф, авозть мяльс рьвакс омбоцеда лисьф рьвянясь ашезь ту, и сон панезе пеки тядязень кудста. Тядязе шачфтомань лия ломанень ширеса, минцень кудоньке ашель. Эряма вастть инкса ашель мезьса пандомс, сяс сашендовсь тиендемс ломаттнень тевснон, ваномс мяльснон. Мзярда ёмланялень, сярятькстонь корьса. Лоткась няемда фкя сельмозе, аф няи тячемс.
Мзярда тонафнень 9 класса, Саранскяйста велезонк сашендсь А.П.Ивашкин. Андрей Петрович шарфтсь лангозон мяль, кизефтезе участковай враченьконь, мезе мархтон. Ся азондозе, кле, эрятама ашуста, пчкафтомс пря аш мезень лангс. Сон и надияфтсь лездомс. Тядязень мархта кочкаськ мекольце трёшниконьконь, и тунь Саранскяи. Андрей Петровичень ашине сата работама вастсонза и меки мрдань вели.
1960 кизоня шумордайне школать, тонафнемс сяда тов ашель мезень лангс. Ушедонь работама Пичпандонь школаса пионервожатайкс. Кизода меле школань директорсь мярьгсь: «Нина, тейть эряви тонафнемс учителькс. Вастце иттнень мархта». Прважайне документонень Мордовскяй госуниверситетонь филологическяй факультету. Августста тердемазь экзаменц. Колмотнень максыне пяк лац, лядондсь мекольцесь—историясь. Повсь кизефкс Великай Отечественнай войнать колга. Хуш тя темать содайне лац, но, улема, таколдомать инкса прясон сембе шорявсь. Ащан партать ваксса, сельмоведне шудихть. Панчсеви кенкшсь и аудиторияв сувси эстонь ректорсь Г.Я.Меркушкин. Яфодезе сельмованфонц лангозон, рузкс кизефтемань, кодама районцта и велеста. Азыне. Сяда тов мархтон корхтазевсь мокшекс: «Улендень тоса, велесь оцю, мазы». Маладсь комиссиянь члеттненди и мярьгсь, кле, тя стирняти эряви тонафнемс университетса. Тяфта и поступань.
Университетса тонафнемась пяк мялезоноль. Сембода пяк мяляфтовсть содаф ломаттнень мархта васедематне. Саранскяйса ётафтф Пионервожатаень конференциять пингста колмошка ши эряме паркть маласа кудняса. Конашкава дивандань, мзярда содайне, што шабракс тейнек ульсь Фёкла Игнатьевна Беззубова. Эняльдень азоравати, штоба содафтолемань сказительницать мархта. Чакаме кенкшезонза, лиссь равжа кувака панарса баба. Сувафтомазь, путсь самовар, сахар покольнят. Лама мезе азондсь тейнек. Мзярда ушедонь работама школаса, тейне ашесть сатне кафта урокне, штоба азондомс колганза.
Васенце курсса тонафнемста ульсь содаф лётчикть М.П.Девятаевонь мархта васедеманьке. Кулхцондоме эсонза. Аньцек школаса работамста шарьхкодине, кинь мархта васетькшнень.
Мокшень мазоптомбялень тиендема Нина Кинякина ушедсь комозьшка кизода инголе. Туфталкс арась стирец Светлана, кона ся пингть морсесь Зубово-Полянскяй райононь «Поляне» народнай ансамбльса. Мокшень панарсь эрявсь мазоптомс, сяс Нина Николаевна ушедсь тянь лангса работама. Семьяса национальнай щамсь содафоль лац. Тядяц, Прасковья Петровна, Оцядуса ульсь инь асу мастерицакс, кона сюреса сёрмадсь мокшень панархт.
Ёмла ожнаста мокшень мазоптомбяльхнень Нина Николаевна тиендезень ветемба, мзярда аделсекшнезе тетрадень проверяманц и планонь сёрмадоманц. Рисункать арьсекшнезе, тонаткшнезе сонць. Васенда рисовандакшнезе тетрадезонза, а меле ётафнезе сонь ёмла ожнанятнень лангс.
Жукуса аш фкявок куд, коса афольхть уле Нина Николаевнань кядьса тифксне. Мокшавась вятьсы койть поколенияста поколенияс. Эсь тевонцты тонафтозе уноконянц Юлиять. Мокшень стирсь Н.П.Огарёвонь лемса Мордовскяй государственнай университетонь филологическяй факультетса тонафнемста морсесь эрь кодама иласа. Щамонц мазышинц и эсь асушинц няфтезень 2019 кизоня Ханты-Мансийскяйса, коса примась участия «Мисс студенчества Финно-угрии» конкурсса.
Мокшавати курок топоди 80 киза. Но сон нинге отькорь, весяла, пяшксе потмонь вийда.
Нина Николаевна, арьсетяма тейть кеме шумбраши и сяда лама цебярь куляда! Сюкпря газетаньконь и марнек мокшеннеть кельгоманкса и ванфтоманкса!
О.Белкина.

Последние новости

Нацпроект и снижение смертности при ДТП

В рамках национального проект «Безопасные качественные дороги» в Мордовии...

В Мордовии продолжается реконструкция районных домов культуры

Торбеевский дом культуры – центр притяжения всего района. Здание...

Дискуссия по развитию БРИКС прошла на Всемирном фестивале молодёжи

В рамках Всемирного фестиваля молодёжи в субботу, 2 марта,...

Саранск встретил март «Весенней ярмаркой подарков» 

1 марта в столице региона, при поддержке Министерства экономики,...

В Региональный сосудистый центр №2 поступает новое современное оборудование

Региональный проект «Борьба с сердечно-сосудистыми заболеваниями» национального проекта «Здравоохранение»...

ПОСЛАНИЕ ПРЕЗИДЕНТА

Инициативы Президента Владимира Путина по итогам послания Федеральному Собранию  29...

Благоустройство Дубенского района Мордовии

Центральная площадь вс. Дубенки, 2 общественные территории в с....

Нацпроект и снижение смертности при ДТП

В рамках национального проект «Безопасные качественные дороги» в Мордовии реализуется региональный проект «Безопасность дорожного движения». Одна из его задач – сокращение смертности в результате...

В Мордовии продолжается реконструкция районных домов культуры

Торбеевский дом культуры – центр притяжения всего района. Здание построено в 1974 году и давно требовало ремонта. В 2023 году по национальному проекту «Культура»...

Дискуссия по развитию БРИКС прошла на Всемирном фестивале молодёжи

В рамках Всемирного фестиваля молодёжи в субботу, 2 марта, прошла дискуссия «БРИКС: новые вызовы в эпоху глобального развития». На мероприятии также прошли дебаты «Приоритеты и...