Ошсь—сонь судьбац

Шуроста васьфтят ломань, кона, кочкамок тев и профессия, ляткшни теест вернайкс сембе пингс. Но кой-коста тяфта уленди. Тячи мялезе пачфтемс Александр Ежовонь колга. Сонь марнек эряфоц сотф Ковылкинать мархта. Александр Викторович эсь сельмоса няезень тя ошса эряма вастть и соцкультбытонь объекттнень строямаснон мархта сотф сембе полафткснень, примсесь эсост участия.
Профессиять кочкаманц мархта сотф кизефкссь инголенза мзярдовок ашезь аще. Улемок цёрашабакс, мялецоль арамс строителькс. И тя теенза удалась. Строителень профессиять получаманкса ашезь эряв якамс ичкози. 3№ Ковылкинскяй средняй школать шумордамдонза меле максозень документонзон тяка райононь строительнай техникуму. Сонь шумордазе аф эстокиге, сяс мес сявозь армияв. Служась Подмосковьяса. Демобилизацияда меле аделазе тонафнеманц, получась диплом и ушедсь работама Ковылкинскяй ПМК-86-са колмоце разрядонь монтажникокс.
Содамошинзон касфтоманкса сась мяльс поступамс вузу. Васенце тяряфтомада меле тя ашезь удала, а кизода меле поступась Н.П.Огарёвонь лемса Мордовскяй госуниверситетонь промышленно-гражданскяй строительствань факультету. Савсь и тонафнемс, и работамс. Киза пяле мархтода меле участкань начальникть Александр Григорьевонь рекомендациянц коряс ётафтозь 1№ участкань мастеркс. Тя коллективса ульсь 60 ломань, ламотне эздост—каменщикт. Самай эста ушедсь эвондама ошень колмоце микрорайонць.
Мзярда Мордовскяй АССР-нь строительствать коряс Управлениянь «Мордовстрой» трестть главнай территориальнай линиянць коряс ПМК-86-ть оцюнянц Казбек Базаевонь ётафтозь работама Рузаевкав, сон мярьгсь, што вастозонза пяк ладяй Александр Ежов.
Александр Викторовичень путозь колоннань руководителькс. Производственнай колма участкатне ащесть каменщикнень и штукатурхнень-малярхнень эзда, но ульсть нинге вспомогательнай службат. Эрявсь мумс марстонь кяль сембе ломаттнень мархта. Вов тяса и кондястсь мастеронь и прорабонь пуроптфт маштомошинза.
1987-2000 кизотнень (тнярс савсь работамс начальникокс) ПМК-86-ть виензон вельде строяфоль силикатнай кирпицень заводса ячеистай бетононь цех. Эвондась типовой школа мархта 450 эряенди финскяй посёлка, шачфтомань куд, котельнай, пожарнай охранань пост Торбеева посёлкаса. Ашесть лоткафнев строямань тефне и Ковылкинаса.
Аф сембось мольсь такорста. Вейхксогемонце кизотнень строяманди закаст пцтай ашельхть, зарплатась макссевсь продуктаса-мезьса. Кадратнень ёткса «шудема» ульсь, но аф оцю.
2000 кизоня мартста Александр Ежов путфоль ошень коммунальнай службань начальникокс. Савсь ваномс ся куттнень мельге, конатнень сонць строязень.
Пингонь ётазь сонь ётафтозь лия вастс—Ковылкина муниципальнай образованиянь администрациянь оцюняти заместителькс. Отвечась жилищно-коммунальнай хозяйствань, энергетикань, строительствань, связень, транспортонь кизефкснень инкса. Тевонзон тиендезень маштозь и цебярьста.
2005 кизоня Ковылкина МО-ть администрациясонза эвондась административнай од «явфтома»—ошень поселения. Кие ули теенза оцюнякс? Тянь лангса райононь руководительхне ламос ашесть арьсе. Конешна, Ежов. И шарьхкотьф мес. Кие, кда аф Александр Викторович содасыне ошень эряйхнень вешфксснон, прябаласнон, кизефксснон.
Ковылкинань мэрсь рабочай шинц ушеткшнезе ошень хозяйствать эзда, ётнезе марнек, штоба шобдавань оперативнай планёркаса лац-ряц корхтамс сотрудникнень мархта, максомс заданият.
Тяфта работазь курокста решандакшневсть хозяйственнай ламоц кизефксне. Ломаттне теенза приёмс сашендсть эрь шиня. Александр Викторович работась и ваймамань, и илань шитнень.
Вете кизода меле, мзярда лиссь полномочиянзон сроксна, теенза эняльдсть тага арамс жилищно-коммунальнай хозяйствань оцюнякс. Кой-коста корхнихть, што «кафксть фкя ляйти аф сувсихть». Но Александр Ежов ашезь эводе и сувась. Сяда цебярь кандидатура эста ашель. И омбоцеда «сувамдонза» меле сон покодсь мянь кемонь кизот.
Ошсь Александр Викторовиченди арась сяшкава малакс, што алясь ашезе арьсе эсь эряфонц соньфтомонза. Ошсь—сонь судьбац.
Василий Илькаев.