Отечествань аралайхне примасть участия Народнай единствань шити лемтьф мероприятиятнень эса

Спецоперациянь ветераттне и геройхнень семьясна марса «Защитники Отечества» фондть координаторонзон мархта арасть илань мероприятиятнень эса почётнай инжикс.
Лямбирскяй районца торжественнай церемонияса максфтольхть Почётнай грамотат и питни казнет СВО-нь ветераттненди Алексей Агафоновонди и Иван Гуданцонди.
Старошайговскяй райононь Культурань центраса ётафтовсь праздничнай концерт, конанди почётнай инжикс арасть боевой действиянь ветераттне Евгений Лошкарёв, Николай Кашкин и Александр Швецов, а нинге СВО-нь шавф и тяниень участникнень раднясна. Мероприятиянь участникне аралайхнень приветствовандазь стяда ащезь.
Большеберезниковскяй районца СВО-са шавф участникть Василий Агейкинонь семьяц ульсь концертса, а Ромодановскяй районца торжественнай мероприятиянь почётнай инжикс арасть шавфнень семьясна.
Торбеевскяй районца Отечествань аралайхнень семьясна ванозь концертть, конань няфтезь тостонь Культурань кудонь артисттне.
«Спасиба, што аф кадондсасть семьяньконь, шарфнетяда лангозонк мяль,—мярьгсь аралайть рьвац Светлана Малышева.—Тя пяк питни! Сембонь ила мархта!»