Отечествань аралайхнень семьяснонды ётафтовсь спортивнай ила

Илать аноклазь и ётафтозь МР-ть эзга «Защитники Отечества» Государственнай фондть филиалоц и «Мордовия Арена» стадионць.
«Весёлые старты» пялькстомась ульсь стадиононь площадкаса. «Гром» и «Буря» командатне пялькстсть ласькомаса, тюбингса арнемаса, канатонь усксемаса и стак тов. Командатне кирдезь фкя-фкянь ширеснон. Сяськикс лиссь «Буря» командась (капитанць СВО-нь ветеранць Андрей Клемешов).
«Минь сидеста примсетяма участия фондть мероприятиянзон эса. И тячивок тясотама. Ульцяса погодась лямбе. Тейне и цёразти сембось мялезонк!»—мярьгсь фкя аралайть рьвац Сабина Максиняева.
Нинге фкя СВО-нь участникть рьвац Ольга Гарькина сашендсь тялонь илас стирнянц Катять мархта. «Сюкпря илань аноклайхненди-ётафтыхненди цебярь пялькстоманкса! Минь ласькондеме, арнеме конькаса и араме сяськикс!»—мярьгсь сон.