ПАНЧФ «ГЕРОЕНЬ ПАРТА»

Аф кунара Атюрьевскяй райононь Перевесье велень основной общеобразовательнай школаса ётафтовсь оцю пуромкс. Панчфоль «Героень парта» школань выпускникти, СВО-нь участникти В.Н.Паркинонди, кона казьф Мужествань орденца (куломдонза меле).
Школаса ламоль инжида. «Героень партать» панжемонза сашендсть Владимир Паркинонь кафта брадонза Иван Николаевич и Пётр Николаевич, раднянза, велеряенза, учителенза.
Пуромксть вятезе Перевесье велень основной общеобразовательнай школать директороц С.Н.Руськина. Сон мярьгсь, кле, тя школать шумордазь содаф и асу лама ломань. Гордостекс и прянь шнафтома вастокс арась и Владимир Паркин, кона эсь эряфонц максозе странаньконь инкса, геройкс шавовсь СВО-са.
Лама лямбе вал велеряйснон, школань выпускникть колга азсть Перевесье велень поселениянь оцюнясь Н.В.Степанов, ветеранонь районнай Советть оцюнянц заместителец Ф.Д.Ивашкин, священниксь, Оцядувонь церькавонь настоятельсь Н.В.Ерёмкин.
«Героень партать» панжемста ульсть СВО-нь участникне Е.С.Симайкина и Ю.В.Мурзайкин.
В.Н.Паркин шачсь-кассь Атюрьевскяй райононь Кяшалня (Духонькина) велеса. Аделазе Перевесье велень основной общеобразовательнай школать, тонафнесь профессионально-техническяй училищаса, получась слесарень-водителень профессия, служась армияса, трудендась «Перевесье» ООО-са. Меля сявозь СВО-в. Шавовсь 2024 кизонь 9 апрельста.
Лемозонза кайгсть стихт. «Героень партать» панжемс правась максфоль брадонзонды И.Н. и П.Н.Паркиттненди. Велеса эряй Владимир Паркинонь тядяц, Мария Васильевна.
Илья ЛЮБАВИН.