14 октябрьста топодель 42 киза Атюрьевскяй райононь Кяшалня (Духонькина) велень эряйти, мокшаляти В.Н.Паркинонди, кона шавовсь специальнай военнай операциять пингста ётай кизонь апрельста.
Российскяй Федерациянь Президентть В.В.Путинонь Указонц мархта Владимир Паркин казьф Мужествань орденца (куломда меле). Перевесье велень основной общеобразовательнай школаса лемозонза панчфоль «Героень парта».
14 октябрьста школаса ётафтовсь митинг, кона лемтьфоль Владимир Паркинонди мемориальнай доскань панжемати. Кайгсь Российскяй Федерациянь Гимнась. Кепотьфоль Российскяй Федерациянь Флагсь. Кайгсть СВО-ти лемтьф стихт, конатнень лувозь школаса тонафнихне Т.В.Паркина, Н.М.Шибайкина, Т.М.Степанова, а Анастасия Кабаева, Олеся Фролова, Светлана Ефремкина, Даша Гальцова, Татьяна Кабаева, Иван Мелишев азондсть содаф землякснон, СВО-нь геройть Владимир Паркинонь колга.
Перевесье велень основной общеобразовательнай школань директорсь С.Н.Руськина отмечазе, што Владимир Паркин ульсь цебярь тонафникс, трудонь кельги ломанькс. Школась, велесь, районць маряйхть инксонза гордость. А лемонц аф юкстасазь мзярдовок. Тяконь квалма корхтасть Мордовия Республикань Государственнай Собраниянь депутатсь Т.М.Волкова, Атюрьевскяй райононь оцюнять заместителец Н.И.Гераськин, ветеранонь Советть вятиец, Афганскяй войнань ветеранць Г.Ф.Арекаев.
Мемориальнай доскань панжемс правась максфоль Владимир Паркинонь брадонзонды Иван Николаевиченди, Пётр Николаевиченди, сазоронцты Татьяна Николаевнанди.
Митингса ульсть геройть раднянза. Велень храмонь настоятельсь С.В.Зинин святиндазе мемориальнай доскать. Азсь лама лямбе вал геройть колга, раднянзон лемс.
Илья Ильин.
Снимкаса: Митингонь
участникне.