Сяськомань Шиня Атюрьевскяй райононь Крхтаж велень средняй общеобразовательнай школаса ётафтовсь митинг, кона лемтьфоль школань выпускникненди, СВО-нь участникненди мемориальнай доскатнень панжемаснонды. Велень вете од цёратне оду мзярдовок аф мрдайхть куду. Синь геройкс шавовсть боень паксяса. Александр Васильевич Леонтьевонь, Василий Васильевич Вергасовонь, Владислав Николаевич Чевтаевонь, Юрий Иванович Алёшкинонь, Николай Егорович Мустайкинонь Россиянь Президентть В.В.Путинонь Указонц мархта казьфт Мужествань орденца (куломдост меле).
Тя шиня школаса ламоль инжида. Митингть панжезь учительхне Н.А.Пиксаева и Т.А.Маскайкина. Кайгсь Гимнась. Российскяй Федерациянь Флагть кеподемс правась максфоль 10-це классонь тонафнити Ульяна Мартышкинати.
Меле корхтась СВО-нь участниксь К.Корнийчук, кона аф кунара сась СВО-ста.
Шачсь сон Крымонь Саки ошса. Пяк рана лядсь тядяфтома-аляфтома. Касфтозь атянц мархта бабац, конат эрясть Крымонь Сакскяй райононь Червоное велеса. Крымса аделась средняй школа, меле тонафнесь Днепропетровскяйса институтса, МВД-нь академияса. 2014 кизоста сявомок Луганскяй и Донецкяй Народнай Республикатнень территорияса военнай действиянь участник. 2022 кизоста сявомок «Крым» штурмовой батальонца разведчик, взводонь командир, отрядонь командиронь заместитель. Казьф Мужествань орденца, «Возвращение Крыма», «За мужество и доблесть» медальхнень мархта. К.Корнийчук школаса тонафнихненди, велень од ломаттненди мярьгсь лац тонафнемс историять, аф кулхцонкшнемс странаньконь эса рдазса валондыхнень.
Мемориальнай доскатнень панжезь В.В.Вергасовонь тядяц, Людмила Николаевна, Н.Е.Мустайкинонь рьвац, Татьяна Андреевна, Ю.И.Алёшкинонь сазороц, Наталья Ивановна. Панжемань церемонияса примасть участия Атюрьевскяй райононь оцюнясь С.Е.Ермолаев, СВО-нь участниксь К.Корнийчук, Луганскяень больницянь хирургическяй отделениянь «милосердиянь сестрась» Н.П.Александрова и лиятне.
Школать омбоце этажсонза панчф «Героень парта». Инжихне ванозь школань историко-краеведческяй музейть. Цебярь экскурсия анокласть музейть заведующаец Н.Н.Сиркина, школань директорсь Н.И.Бурнашкин, завучне С.И.Чумарова, Н.А.Пиксаева. Школаса тонафнихне и учительхне стихса и мороса лятфнезь эсь атяснон-щятяснон, конат тюрсть фашисттнень каршес, СВО-нь геройхнень.
Крхтаж велень поселениянь Оброчнай велеса 9 Майста панчф Великай Отечественнай войнаса шавфненди обелиск.
Илья ВЕШКИН.
Фототне авторть.