Оцю работа тянь ширде вяти и Инсарскяй муниципальнай районнай администрациясь, коса оцюнякс Х.Ш.Якуббаев. Администрациять видеса кочкаф экспертнай комиссия, конань членонза ковти кафксть-колмоксть ванондсазь ся куттнень, конатнень эса эрямась арси пельксокс. Комиссиясь максси аварийнай куттненди оценка и районнай администрациянь оцюнять мархта примсихть ломаттнень од эряма вастс ётафнемаснон коряс решеният. Тянкса строяфтольхть лама квартирань кафта од кутт, конат аньцек-аньцек сувафтфт стройс Инсар ошть кучкаса. Од квартираста панжематнень получазь сят, кит лама киза эрясть ташта кудса. Синь ётксост пенсионерхт, образованиянь, медицинань и культурань работникт, лия категориянь граждатт.
—Лама ломань нинге эряй общежитияса, коса теест максфтольхть комнатат советскяй пингть,—азонды райононь оцюнясь Харис Якуббаев.—Шарьхкотьф, кизотне сявсазь синценнеть, ламоц куттне таштомсть, сяс тяни строямат отт, тяниень пингонь вешфкснень коряс. Аньцек мекольдень кофнень ётась од эряма вастс ведьгемоньда лама семья. Квартиратне оцюфт, валтт, синь эсост тифт эрямань сембе условиятне.
Апак юкстак тяса и иттнень колга. Од куттнень ваксса строяфт, панчсефт идень площадкат, коса ули кода налхксемс, ётафнемс занятият спортса.
Н.ЛОБАНОВ.