Ломаттне корхнихть, казнесь музе эсь героенц. Мзярда Саранскяйса Культурань республиканскяй Дворецса «Шумбрат, Мордовия!» Народнай творчествань республиканскяй XXVI фестивальть-конкурсть гала-концертонц пингста республикань Оцюнясь Артём Здунов культураса лама киза и седикс-ваймокс работаманкса баянистти Вячеслав Ломакинонди макссь Мордовия Республикань культурань Заслуженнай работниконь лем, залса цяпаматне нинге сяда вихонзасть и ламос ашесть сетьме. И тянди аш месть дивандакшнемс, вдь Порапа велень мокшалять творческяй киц содаф аф аньцек Ковылкинскяй районца, но и марнек республикаса.
Нильгемонь кизоста культураса работамста Вячеслав Ломакинонди кодама аньцек иласа, мероприятияса ашезь сашендов улендемс, примсемс участия. И тяфта тячемс. Катк тя ули ила, кона лемтьф сёронь касфнихненди и жувата мельге якайхненди, кудонь и кинь строяйхненди, медицинаса, образованияса, полицияса и лия сфераса покодихненди. Сонь моронзонды, баянца мораманцты кеняртькшнесть, макссесть оцю питне кода концертонь ваныхне, стане и жюрись. Вячеслав Григорьевич лама киза мельцек ульсь «Шумбрат, Мордовия!» Народнай творчествань республиканскяй фестивальса дипломантокс, теенза макссевсть казнет, благодарственнай сёрмат.
—Мекольце фестивальсь тейне инь мяляфтовись. Республикань Оцюнясь Артём Здунов мяштезон повфтазе Заслуженнай работниконь знакть,—мярьгсь мокшалясь В.Г.Ломакин.—Тя казнети мон молень нильгемоньда лама киза, кода маштонь касфтонь районнай и республикань культурать эса, аноклакшнень и ётафнень концертт, илат, цёранятнень и стирнятнень тонафнине кельгомс мокшень моротнень, сиде моронятнень, ванфнемс койхнень-обуцятнень. И семботь тянь тиендине оцю мяль вельде, эсь пингонь аф ужяльдезь. Кой-мзярда концерттне, репетициятне тарксевсть пялевес, но сякокс седиса най ляткшнесь инь цебярсь, мяляфтовись.
Музыкати кельгомась Ломакиттнень семьяса моли аляснон, Григорий Егоровичень, и тядяснон, Раиса Борисовнань, эзда. Синь лацост кржа кие велеса маштсь кштима-морама, эрь кодама инструментса морама.
—Мзярда алязе сявондезе кядезонза балалайканц, морамац марявсь Порапань сембе кужетнень эса,—сяда тов азонды Вячеслав Ломакин.—Ванат, пингонь ётазь кудоньконь перьф кочкавихть стирьхть-цёрат, эряфкшу ломатть, гармонияса морайхть и эста сембе велети улендсь эсь лацонь ила. Ашельхть аф сялондомат, аф фкя-фкянди врьгятнемат, тюремат. А шобдава ломаттне оцю мяльса якасть работама. Ужяль, шачфтыеньке-касфтыеньке рана тусть эряфста, но синь тевснон поладозь иттне, унокне.
Аляснон, тядяснон и брадснон лаца музыкати прафтсть Вячеславонь сазоронза Ольга и Анна. Синь тяфта жа эряйхть Порапа велеса, морсихть морот, сиде моронят «Родники» ансамбльса, конанди вятикс Мордовия Республикань культурань Заслуженнай работниксь В.Г.Ломакин. Сон маряй гордость сазоронзон инкса, лезды теест од моронь мушендомаса, сёрмадомаса. Ялганц Владимир Мелёшкинонь мархта нолдасть дискт, коза сувасть мокшень и рузонь морот, сиде моронят. Марстонь творческяй тевсна шиста шис вихонзай, аноклавихть од моронь дискт, касфневи репертуарсна.
—Ня шитнень мон вятян репетицият, аноклан участникт «Шумбрат!» республиканскяй идень фестивальти. Порапань школаста тя конкурсса примайхть участия Нина Кулагина, Диана Канайкина, Марина Канайкина, Анастасия Ломакина и Полина Унгуряну. Полинань юронза молихть Молдавиянь модаста, но стирнясь лац шарьхкодьсы мокшень кяльть и мяль вельде морсесыне минь мороньконь. конкурсонь васенце этапнень минь ни ётаськ, тяни аноклатама лиятненди, мяленьке лисемс финалс. Ули надияма, што идень тя фестивальса сяфтяма васенце-омбоце вастт,—азозе мокшалясь В.Г.Ломакин.
Эсь ширденк арьсетяма Вячеслав Григорьевиченди творческяй од сатфкст, шумбраши, паваз и лама кизонь эряф!
Н.ЛОБАНОВ.